معروف بالی ووڈ اداکار انو کپور نے کنگنا رناوت کو تھپڑ مارنے کے معاملے پر پوچھے گئے سوال پر اپنے جواب میں کہا ہے کہ ’کنگنا رناوت کون ہے؟
انو کپور کی سوشل کامیڈی ڈرامہ فلم ’ہمارے بارہ‘ آج 21 جون کو بھارت میں ریلیز ہو رہی ہے۔ فلم اپنے متنازع مواد کی وجہ سے خبروں میں تھی لیکن اب بمبئی کورٹ نے فلم پر سے پابندی ہٹا دی ہے۔ اس عدالتی کامیابی پر انوکپور نے 20 جون کی رات فلم کی ٹیم کے ہمراہ میڈیا سے گفتگو کی۔ اس دوران جب ان سے کنگنا رناوت کو تھپڑ مارے جانے کے واقعے کے بارے میں سوال پوچھا گیا تو انو کپور نے کہا کہ کنگنا رناوت کون ہے؟ اس پر سب لوگ بے ساختہ ہنس پڑے۔
انو کپور نے رپورٹر سے جواباً پوچھا کہ کنگنا رناوت کون ہے، یہ کنگنا جی کون ہیں؟ بھائی پلیز بتاؤ کون ہیں؟ وہ کوئی نہ کوئی اداکارہ ضرور ہے، کیا وہ خوبصورت ہے؟ انو کپور کی یہ ویڈیو سوشل میڈیا پر خوب وائرل ہو رہی ہے۔
یاد رہے کہ فلم ’ہمارے بارہ‘ پر پابندی اس لیے لگائی گئی تھی کہ یہ مسلمان گھرانوں میں بہت زیادہ بچے پیدا ہونے کا احاطہ کیے ہوئے ہے، اس پر کافی اعتراضات سامنے آئے لیکن اب بمبئی کورٹ نے اس معاملے کا جائزہ لیتے ہوئے فیصلہ دیا ہے کہ فلم میں کچھ بھی قابل اعتراض نہیں ہے۔
