کچے میں تعینات پولیس اہلکاروں کو جدید ہتھیار چلانے کی تربیت دی جائے، مراد علی شاہ

وزیراعلی سندھ مراد علی شاہ نے کہا ہے کہ وہ صوبے میں سیف سٹی پر کام تیز کرنا چاہتے ہیں، سیف سٹی کے لیے جون کے آخر میں سی سی ٹی وی کیمروں کی شپمنٹ آجائے گی، کچے میں تعینات پولیس اہلکاروں کو جدید ہتھیار چلانے کی تربیت دی جائے۔

وزیرعلیٰ سندھ سید مراد علی شاہ کی زیر صدارت صوبے میں امن و امان سے متعلق اجلاس ہوا، اجلاس میں سیف سٹی پروجیکٹ، کچے کےعلاقوں میں ڈکیتوں کے خلاف آپریشن اور سی ٹی ڈی کو مزید سہولیات دینے کے حوالے سے غور کیا گیا۔

صوبائی وزیرداخلہ کی وزیراعلیٰ سندھ کو بریفنگ

اس موقع پر وزیرداخلہ سندھ ضیا لنجار نے وزیراعلیٰ سندھ کو بریفنگ میں بتایا کہ انہوں نے پولیس تھانوں کے دورے شروع کیے ہیں، اسٹریٹ کرائم کو کنٹرول کر رہے ہیں۔

ضیا لنجار نے بریفنگ میں بتایا کہ کچے کے علاقوں میں ڈاکوؤں کے خلاف آپریشن جاری ہے، ڈاکوؤں کے خلاف پولیس اور رینجرز کی مشترکہ کاروائیاں جاری ہیں، 14 ڈرون کیمرے سکھر، گھوٹکی، کشمور اور شکارپور کو دیے ہیں، ڈرون کیمروں سے کچے میں ڈاکوؤں کے ٹھکانوں پر نظر رکھی جائی گی، مزید 20 ڈرون کیمروں کی ضرورت ہے۔

وزیر داخلہ سندھ نے کہا کہ دہشتگردی کے مقدمات کی پراسیکیوشن بہتر ہوئی ہے، 2023 کے سات مقدمات اور 2024 میں 11 کیسز میں سزائیں ہوئی ہیں۔

پولیس اہلکاروں کو جدید ہتھیار چلانے کی تربیت دیں، وزیراعلی سندھ

وزیراعلیٰ مراد علی شاہ نے آئی جی سندھ کو ہدایت کی کہ کچے میں تعینات پولیس اہلکاروں کو جدید ہتھیار چلانے کی تربیت دی جائے۔

آئی جی سندھ نے وزیراعلیٰ کو بتایا کہ سکھر اور لاڑکانہ ڈویژن کے پولیس اہلکاروں کی تربیت کی ہے ، مزید اہلکاروں کی تربیت کررہے ہیں، سندھ اور پنجاب میں کرائم کرنے والے ڈاکوؤں کے لیے ٹرائی بارڈر مینجمنٹ سسٹم بنائیں گے۔

آئی جی سندھ کے مطابق ٹرائی بارڈر سے متعلق اجلاس رواں سال فروری سے جاری ہیں، ٹرائی بارڈر میٹنگز میں بہاولپور، رحیم یار خان اور راجن پور کے سینیئر پولیس افسران سے رابطہ رہتا ہے۔

کاؤنٹر ٹیررازم کے ریجنل کمپلیکس پر کام تیز کیا جائے

وزیراعلیٰ سندھ مراد علی شاہ نے اس موقع پر کاؤنٹر ٹیررازم پولیس کے 4 ریجنل کمپلیکس بنانے کے کام کو تیز کرنے کی ہدایت کی۔

وزیراعلیٰ سندھ نے کہا کہ سی ٹی ڈی کے 4 ریجنل کمپلیکس حیدرآباد، میرپورخاص، سکھر اور لاڑکانہ میں قائم کیے جارہے ہیں۔

سی ٹی ڈی ریجنل کمپلیکس کے لیے گرانٹ منظور

اجلاس میں وزیراعلیٰ نے سی ٹی ڈی ریجنل کمپلیکس کے لیے 2.8 ارب روپے کی منظوری دی۔ انہوں نے کہا کہ سافٹ وئیر اور فرانزک ٹولز کے لیے 400 ملین روپے پولیس کو دیے ہیں۔

وزیراعلیٰ سندھ نے وزیرداخلہ سندھ کو سافٹ ویئر کو فوری فعال کرنے کی ہدایت دی۔