اسمبلی اجلاس میں اپوزیشن کی ہنگامہ آرائی، پنجاب کا ضمنی بجٹ منظور نہ ہوسکا

پنجاب اسمبلی میں اپوزیشن کی جانب سے ہنگامہ آرائی کے باعث ضمنی بجٹ منظور نہیں کیا جاسکا، اسپیکر نے اجلاس کل دوپہر تک ملتوی کردیا۔

پنجاب اسمبلی کے بجٹ اجلاس میں وزیراعلیٰ پنجاب مریم نواز شریف کی تقریر کے دوران اپوزیشن اراکین نے شور شرابا کرتے ہوئے شدید نعرے بازی بھی کی جب کہ ضمنی بجٹ کی منظوری کے موقع پر بھی اپوزیشن اراکین نے ہنگامہ آرائی کی۔

اسپیکر پنجاب اسمبلی ملک محمد احمد خان نے اپوزیشن کی ہنگامہ آرائی کے باعث ضمنی بجٹ کی منظوری کا عمل موخر کرتے ہوئے کہا کہ انہوں نے ہاؤس کو بہتر انداز سے چلانے کی کوشش کی اور آئندہ ہاؤس کو ان آرڈر چلانے کے لیے اپنا آئینی اختیار استعمال کروں گا۔

اپوزیشن اراکینِ پنجاب اسمبلی کی جانب سے ہنگامہ آرائی کے بعد اسپیکر ملک محمد احمد خان نے پنجاب اسمبلی کا اجلاس کل دوپہر 2 بجے تک ملتوی کردیا ہے۔

بعد ازاں میڈیا سے گفتگو میں صوبائی وزیرِ اطلاعات عظمیٰ بخاری کا کہنا تھا کہ صوبائی اسمبلی میں ان کی جماعت بھی اپوزیشن میں رہی ہے لیکن موجودہ اپوزیشن جیسی بدتمیزی کبھی کی، ان کا کہنا تھا کہ جتنا برا سلوک ممکن ہے آج اپوزیشن نے ان کے ساتھ روا رکھا ہے، وزیراعلیٰ کے خطاب کے دوران جو کچھ ہوا قابل افسوس ہے۔

عظمیٰ بخاری کا کہنا تھا کہ اپوزیشن اراکین کو تمام مراعات فراہم کی جارہی ہیں، ان کی جماعت نے تحریک انصاف کے وزیراعلیٰ عثمان بزدار کے دور میں بھی اس نوعیت کی کوئی بدتمیزی نہیں کی، اب فیصلہ کیا ہے کہ آئندہ اپوزیشن رکن کی بھی تقریر نہیں سنی جائے گی، اپوزیشن کو ان کے طرزِ عمل کے مطابق ویسا ہی جواب دیا جائےگا۔