قطر کے دارالحکومت دوحا میں اقوام متحدہ کے زیراہتمام کانفرنس سے قبل گزشتہ روز پاکستانی وفد نے امریکی وفد سمیت مختلف وفود سے اہم ملاقاتیں کی ہیں، جس میں فریقین نے افغانستان کی صورتحال، تیسری دوحا کانفرنس اور مختلف مسائل اور حل پرمشاورت کی۔
سفارتی ذرائع کے مطابق دوحا میں افغانستان پر پاکستان اور امریکا کے درمیان گزشتہ روز مشاورت ہوئی ہے، امریکی نمائندہ خصوصی برائے افغانستان تھامس ویسٹ نے اپنے وفد کے ہمراہ پاکستانی وفد سے ملاقات کی۔
پاکستانی وفد میں نمائندہ خصوصی آصف درانی، قطر میں پاکستانی سفیر ڈاکٹر محمد اعجاز اور وفد میں شامل کابل میں ہیڈ آف مشن عبیدالرحمن نظامانی شامل تھے۔
ذرائع کے مطابق اقوام متحدہ کی میزبانی میں افغان کانفرنس کے موقع پر پاکستانی وفد کی دیگر ممالک کے وفود سے بھی ملاقاتیں ہوئی ہیں، پاکستانی وفد نے روسی نمائندہ خصوصی ضمیر کابلوو سمیت نمائندہ خصوصی ٹامس نکلسن کی سربراہی میں یورپین یونین کے وفد سے بھی گزشتہ روز ملاقات کی ہے۔
