پاکستان مسلم لیگ (ن) کی چیف آرگنائزر مریم نواز کے مالی اثاثوں کی تفصیلات سامنے آ گئیں۔ مریم نواز مجموعی طور پر 84 کروڑ 25 لاکھ روپے سے زائد اثاثوں کی مالک ہیں۔ مریم نواز نے مالی اثاثوں کی تفصیلات اپنے کاغذات نامزدگی کے ساتھ جمع کرائی ہیں۔
دستاویزات کے مطابق مریم نواز 2 کروڑ 89 لاکھ روپے سے زائد کی مقروض ہیں جو انہوں نے حسن نواز سے لے رکھا ہے۔ مریم نواز رائیونڈ کے علاقے میں ایک ہزار 400 کنال سے زائد اراضی کی مالک ہیں اور بیرون ملک ان کی کوئی جائیداد نہیں۔
مریم نواز نے دستاویزات میں بتایا ہے کہ ان کے شوہر کیپٹن صفدر بھی دوستوں کے 6 کروڑ روپے کے مقروض ہیں۔ مریم نواز نے 3 برس میں ایک کروڑ 90 لاکھ روپے سے زائد زرعی آمدن ظاہر کی ہے۔
دستاویزات کے مطابق مریم نواز نے 3 برس میں زرعی اراضی سے آمدن پر 12 لاکھ روپے سے زائد ٹیکس ادا کیا۔ انہوں نے حدیبیہ پیپر ملز میں 54 لاکھ 69 ہزار روپے سے زائد کے شیئرز جبکہ محمد بخش ٹیکسٹائل ملز میں بھی 48 لاکھ 21 ہزار روپے کے شیئرز خرید رکھے ہیں۔
مریم نواز حمزہ اسپننگ ملز میں 16 لاکھ، جنید پولٹری فارمز میں 90 ہزار روپے مالیت کے شیئرز کی مالک ہیں اور ان کے پاس ذاتی گاڑی نہیں ہے۔
دستاویزات کے مطابق مریم نواز کے بینک اکاؤنٹس میں 78 لاکھ روپے سے زائد کی رقم موجود ہے۔ انہوں نے کاغذاتِ نامزدگی میں تعلیمی قابلیت ایم اے انگلش لٹریچر ظاہر کی ہے۔
