بھارتی کرکٹ بورڈ نے اعلان کیا ہے کہ روہت شرما ایک روزہ اور ٹیسٹ ٹیم کے کپتان برقرار رہیں گے۔
بی سی سی آئی کے سیکریٹری جے شاہ نے روہت شرما کو ایک روزہ کرکٹ اور ٹیسٹ ٹیم کا کپتان برقرار رکھنے کا اعلان کرتے ہوئے کہاکہ چیمپیئنز ٹرافی اور ورلڈ ٹیسٹ چیمپیئن شپ ہمارا اگلا ہدف ہے۔
انہوں نے کہاکہ میں پُرامید ہوں کہ بھارتی کرکٹ ٹیم روہت شرما کی قیادت میں یہ دونوں ایونٹس جیتے گی۔
جے شاہ نے ٹی20 ورلڈ کپ کی جیت بھارتی ٹیم کے کوچ راہول ڈریوڈ، کپتان روہت شرما، ویرات کوہلی اور جڈیجا کے نام کرتے ہوئے کہاکہ روہت شرما کی قیادت میں بھارت نے ایک سال میں 3 بڑے فائنل کھیلے۔
یہ بھی پڑھیں بھارتی کرکٹ بورڈ نے ٹی20 ورلڈ کپ کی چیمپیئن ٹیم کے لیے کتنی رقم کا اعلان کیا، سن کر آپ بھی حیران رہ جائیں گے
واضح رہے کہ بھارت نے حال ہی میں دوسری مرتبہ ٹی20 ورلڈ کپ جیتنے کا اعزاز اپنے نام کیا ہے، بھارتی ٹیم نے فائنل میں جنوبی افریقہ کو شکست دی۔
یاد رہے کہ ٹی20 ورلڈ کپ میں جیت کے بعد کپتان روہت شرما، ویرات کوہلی اور رویندرا جڈیجا نے ریٹائرمنٹ کا اعلان کردیا تھا، جبکہ بھارتی ٹیم کے کوچ راہول ڈریوڈ کا بھی یہ آخری ایونٹ تھا۔
