وزیراعظم شہباز شریف کے معاون خصوصی برائے احتساب و داخلہ عرفان قادر نے عہدے سے استعفیٰ دے دیا۔
میڈیا رپورٹ کے مطابق وزیراعظم شہباز شریف کے معاون خصوصی برائے احتساب و داخلہ عرفان قادر نے اپنے عہدے سے استعفی دیدیا، وزیر اعظم شہباز شریف نے عرفان قادر کا استعفیٰ منظور کر لیا۔
دوسری جانب الیکشن کمیشن نے عرفان قادر کو اپنا وکیل مقرر کردیا ہے۔
پنجاب اور خیبر پختونخوا میں انتخابات ملتوی کیس میں الیکشن کمیشن کی جانب سے عرفان قادر روسٹرم پر آئے تو چیف جسٹس عمر عطا بند یال نے کہا کہ آپ الیکشن کمیشن کی نمائندگی نہیں کر سکتے۔
عرفان قادر نے چیف جسٹس کو جواب میں کہا کہ صرف یہ جاننا چاہتا ہوں کہ عدالت مجھے الیکشن کمیشن کے وکیل کے طور پر سننا چاہتی ہے یا نہیں؟ بنچ کہہ دے کہ میں الیکشن کمیشن کی نمائندگی نہ کروں تو چلا جاؤں گا۔
چیف جسٹس نے کہا کہ الیکشن کمیشن کی جانب سے گزشتہ روز حامد علی شاہ اور سجیل سواتی پیش ہوئے تھے، جس پر عرفان قادر کمرہ عدالت سے باہر چلے گئے۔
