سوشل میڈیا پلیٹ فارم ٹک ٹاک پر اپنے منفرد انداز اور طنز و مزاح کی ویڈیوز سے وائرل ہونے والے ننھے سپر اسٹار ابو بکر کی وزیر اعلیٰ ہاؤس بلوچستان میں بلاول بھٹو سے ملاقات کی ویڈیو کے چرچے سوشل میڈیا پر شروع ہوگئے ہیں۔ اس سے قبل بھی ابو بکر نے وزیر اعلیٰ بلوچستان اور جمال رئیسانی سے ملاقات کی تھی جس کے سوشل میڈیا پر خوب چرچے ہوئے تھے۔
وزیر اعلیٰ ہاؤس میں بلاول بھٹو کی آمد کے دوران ننھے ٹک ٹاکر ابو بکر عرف بابا چے کو بھی بلایا گیا، بلاول بھٹو زرداری سے ملاقات کے دوران وزیر اعلیٰ نے ابوبکر سے بلاول کا شکریہ ادا کرنے کو کہا، جس پر بلاول بھٹو نے ابو بکر کا شکریہ ادا کرتے ہوئے کہا کہ ’آپ کا شکریہ کہ آپ یہاں آئے‘۔
مزید پڑھیں: ننھے ٹک ٹاکر کی شکایت رنگ لے آئی، بلوچستان حکومت نے بڑے اعلانات کردیے
خیال رہے حال ہی میں ننھے ٹک ٹاکر ابوبکر نے ایک ویڈیو پوسٹ کی تھی جس میں وہ صحافی و اینکر وسیم بادامی سے شکوہ کرتے نظر آئے۔ ان کا کہنا تھا کہ وسیم بادامی! میں آپ سے بہت ناراض ہوں، آپ نے سب بچوں کو رمضان ٹرانسمیشن میں بلایا لیکن مجھے شرکت کی دعوت نہیں دی۔
’کیا میں بچہ نہیں ہوں یا مجھ میں ٹیلنٹ کی کمی ہے؟ کیا میں دوسرے بچوں سے کم ہوں؟ کیا میں پاکستان سے نہیں ہوں آپ ایسے کیوں کرتے ہو؟‘
ابوبکر نے مزید کہا کیا مجھے اس لیے رمضان ٹرانسمیشن میں نہیں بلایا گیا کیونکہ میں بلوچستان سے ہوں، ان کا کہنا تھا کہ میری بات کا برا نہیں ماننا میں آپ سب سے پیار کرتا ہوں۔
ابوبکر کی ویڈیو وائرل ہوتے ہی وزیر اعلیٰ بلوچستان سرفراز بگٹی نے ننھے ٹک ٹاکر کو وزیر اعلیٰ ہاؤس مدعو کیا۔ جہاں اپنے جاری کردہ ویڈیو بیان میں انہوں نے کہا کہ بلوچستان کا ٹیلنٹ کسی بھی طرح دیگر صوبوں سے کم نہیں۔ حکومت اپنے باصلاحیت آرٹسٹ کی حوصلہ افزائی کرتے ہوئے انہیں آگے بڑھنے میں مدد اور موقع فراہم کرے گی۔
یہ بھی پڑھیں: کوئٹہ کے ننھے ٹک ٹاکر ابوبکر نے ویڈیوز بنانا کیوں روک دیں؟
وزیر اعلیٰ بلوچستان میر سرفراز بگٹی نے ابوبکر کے تعلیمی اخراجات اٹھانے کا اعلان کیا، میرسرفراز بگٹی ان سے پیار و شفقت سے ملے، وزیر اعلیٰ بلوچستان نے چائلڈ ٹک ٹاکر کی صلاحیتوں کے اعتراف میں ایک لاکھ روپے عیدی اور ماسٹر تک تعلیمی کفالت کا اعلان کیا۔
بعد ازاں دوسری جانب نوجوان رکن قومی اسمبلی نوابزادہ جمال خان رئیسانی نے بھی ننھے ٹک ٹاکر ابوبکر عرف بابا چے سے ملاقات کرتے ہوئے اس کی حوصلہ افزائی کی، اور ننھے ابوبکر کا معروف اینکرپرسن وسیم بادامی سے رابطہ کرایا، جس پر وسیم بادامی نے ابوبکر کو ٹی وی پر لائیو دعوت دینے کی یقین دہانی کروائی۔ وسیم بادامی نے کہا کہ میں آج آپ کو ٹرانسمیشن میں لائیو دعوت دوں گا۔ اگلے سال آپ یکم رمضان المبارک سے ٹرانسمیشن کا حصہ ہوں گے۔
