وفاقی وزیر خزانہ محمد اورنگزیب نے کہا کہ نئے قرض پروگرام پر آئی ایم ایف سے معاہدہ رواں ماہ ہو جائے گا۔ آئی ایم ایف سے مذاکرات مثبت انداز میں آگے بڑھ رہے ہیں، حکومتی اخراجات میں کمی کے لیے 5 وزارتوں کو ختم کیا جائے گا۔
سینیٹ کمیٹی برائے خزانہ کے اجلاس میں گفتگو کرتے ہوئے محمد اورنگزیب نے کہا کہ اخراجات میں کمی کے لیے 5 وزارتوں کو ختم کیا جائے گا، آئی ایم ایف سے مذاکرات مثبت انداز میں ہورہے ہیں، آئی ایم ایف اصل آمدن پر ٹیکس چاہتا ہے جو درست ہے۔
مزید پڑھیں: آئی ایم ایف کے بیل آؤٹ چکر سے نکلنے کے لیے ٹیکسوں میں اضافہ ناگزیر ہوگا، وزیر خزانہ محمد اورنگزیب
وزیر خزانہ کا کہنا تھا کہ کوئی ملک 9 فیصد ٹیکس ٹو جی ڈی پی پر نہیں چل سکتا۔ آئی ایم ایف پروگرام کی وجہ سے دیگر اداروں سے فنڈز ملنا شروع ہوگئے ہیں۔
وزیر خزانہ محمد اورنگزیب نے کہا کہ گزشتہ مالی سال کے دوران میکرو اکنامک صورتحال بہتر رہی ہے، زرمبادلہ کے ذخائر بھی مستحکم رہے۔
محمد اورنگزیب نے کہا کہ 2023 میں آئی ایم ایف پروگرام تاخیر کا شکار ہوا، جس کی وجہ سے زرمبادلہ کے ذخائر اور روپے کی قدر میں کمی ہوئی۔
’اسٹاک ایکسچینج میں بھی تیزی دیکھنے میں آئی ہے، اس وقت ملک کے مجموعی معاشی اشاریے مثبت ہیں‘۔
محمد اورنگزیب نے کہا کہ نگران حکومت کے دوران انتظامی اقدامات کیے گئے تھے، فی الحال کسی چیز پر مصنوعی کنٹرول نہیں کیا گیا۔
وزیر خزانہ نے کہا کہ ٹیکس ٹو جی ڈی پی شرح 9 فیصد ہوتے ہوئے ملک نہیں چل سکتا، ہم اس شرح کو بڑھا کر 13 فیصد کریں گے۔
یہ بھی پڑھیں: توقع ہے کہ بہت جلد آئی ایم ایف سے نیا پروگرام طے ہوجائے گا، وزیرخزانہ محمد اورنگزیب
ان کا کہنا تھا کہ سارے شعبے ملک کی معاشی صورتحال کو بہتر ہونا دیکھنا چاہتے ہیں، تاہم کوئی خود کو پہلے مشکل صورتحال میں ڈالنا نہیں چاہتا۔
انہوں نے بتایا کہ جون تک 52 ارب کے روپے کے ریفنڈز جاری کیے ہیں۔ ہم نے سب کو فائلر بنانا ہے، ہم سب کو ٹیکس نیٹ میں لائیں گے۔
وزیر خزانہ نے کہا کہ ایف بی آر پر عوام کا اعتماد بڑھایا جائے گا، کیا آئی ایم ایف اندازے سے ٹیکس کے بجائے اصل آمدن پر ٹیکس مانگ رہا ہے، ہم اس کو حاصل کرنے کی کوشش کر رہے ہیں۔
