’میری بیوی کو تو چھوڑ دیں‘، عمران خان کی جج کے روبرو استدعا

بانی پی ٹی آئی عمران خان کا توشہ خانہ ریفرنس سے متعلق کیس میں سماعت کے دوران کہنا تھا کہ مجھے جیل میں ڈالیں میری بیوی کو تو چھوڑ دیں۔ میں صرف اپنی بیوی کی بات کرتا ہوں، اس کو دوبارہ گرفتار کرکے بہت غلط کیا ہے۔

یہ بھی پڑھیں:توشہ خانہ نیا ریفرنس: عمران خان اور بشریٰ بی بی کا 8 روزہ جسمانی ریمانڈ منظور

بانی پی ٹی آئی عمران خان نے آج اڈیالہ جیل میں توشہ خانہ ریفرنس کی سماعت کے دوران میڈیا کی عدم موجودگی پر اعتراض کرتے ہوئے کہا کہ اگر میڈیا نہیں آتا تو میں عدالت سے واک آؤٹ کرجاؤں گا۔

عمران خان کے اعتراض کے بعد عدالت نے میڈیا نمائندگان کو جیل کے اندر بلانے کا حکم دیا،میڈیا نمائندوں کے عدالت میں داخل ہوتے ہی سماعت کا آغاز ہوا۔

صرف مجھے اذیت پہنچانے کے لیے بشریٰ بی بی کو جیل میں ڈال رکھا ہے

سماعت کے آغاز پر جب بانی پی ٹی آئی روسٹم آئے تو انہوں نے کہا کہ جج صاحب میری بیوی کا توشہ خانہ سے کچھ لینا دینا نہیں۔ بشریٰ بی بی کو صرف مجھے اذیت پہنچانے کے لیے جیل میں ڈال رکھا ہے۔

یہ بھی پڑھیں:توشہ خانہ نیا ریفرنس: عمران خان اور بشریٰ بی بی کا ٹرائل جیل میں ہوگا، نوٹیفکیشن جاری

انہوں نے کہا جیل میں 4 مرتبہ قرآن پڑھا ہے اس میں ججز پر اللہ نے بہت ذمہ داری ڈالی ہے۔

ان کا کہنا تھا کہ میری بیوی کو بادشاہ سلامت ٹارگٹ کررہے ہیں،کیونکہ میں نے اس کو حساس عہدے سے ہٹایا اور میری بیوی نے اس کی سفارش نہیں کی۔

میری بیوی کو تو چھوڑ دیں

ان کا کہنا تھا کہ مجھے جیل میں ڈالیں میری بیوی کو تو چھوڑ دیں، ان کا کہنا تھا کہ جج صاحب آپ اللہ کو جوابدہ ہیں، آئی ایس آئی کو جوابدہ نہیں ہیں۔

یہ بھی پڑھیں:عدلیہ کے فیصلے کے بعد حکومت تصادم کی طرف بڑھ رہی ہے، اسد قیصر

بانی پی ٹی آئی نے کہا کہ جج بشیر نے کہا تھا سر پر بندوق رکھ کر فیصلہ لیا ہے۔سابق وزیراعظم کو رات 12 بجے بتایا جاتا ہے صبح نیا کیس لگے گا۔

جیولری سیٹ ہمارے پاس ہے

انہوں نے کہا کہ نیب والے روبوٹ ہیں، ان کو تنخواہ دے کر جو مرضی کام کروالیں۔ پہلے جس ریفرنس میں سزا ہوئی وہ جیولری سیٹ ہمارے پاس ہے۔ اس کی قیمت 1 کروڑ 80 لاکھ تھی انھوں نے 3.15 ارب کردی۔

میری بیوی کو دوبارہ گرفتار کرکے بہت غلط کیا

انہوں نے کہا کہ میں صرف اپنی بیوی کی بات کرتا ہوں، اس کو دوبارہ گرفتار کرکے بہت غلط کیا ہے۔ دوسرا کیس اس لیے بنایا ہے کیونکہ ان کو پتا چل گیا ہے پہلا سیٹ ہمارے پاس ہے۔

یہ بھی پڑھیں:عمر ایوب کا وزیراعظم پر ایم این ایز اغوا کروانے کا الزام، اراکین کو محفوظ مقامات پر منتقل ہونے کی ہدایت

جنگل کے بادشاہ نے سب کچھ کرایا

انہوں نے کہا کہ پہلے آفتاب سلطان اور دیگر لوگ مستعفی ہوئے کیونکہ یہ غلط فیصلے کرانا چاہتے تھے۔جنگل کے بادشاہ نے سب کچھ کرایا ہے۔

سماعت کے دوران بانی پی ٹی آئی اور بشری بی بی ایک ساتھ بیٹھے رہے۔

واضح رہے کہ کل عدت میں نکاح کیس میں عمران کی اپیلیں منظور ہونے کے بعد انہیں اور ان بیوی بشریٰ بی بی کو توشہ خانہ سے متعلق ایک نئے کیس میں گرفتار کرلیا گیا تھا۔ اور اس کیس کی سماعت جیل میں ہونے سے متعلق نوٹیفیکیشن بھی جاری کردیا گیا تھا۔