امریکا نے پاکستان تحریک انصاف پر پابندی لگانے کے حکومتی فیصلے پر تشویش کا اظہار کیا ہے۔
امریکی محکمہ خارجہ کے ترجمان نے کہاکہ ہم نے حکومت پاکستان کے بیانات دیکھے ہیں، کسی بھی سیاسی جماعت پر پابندی ہمارے لیے قابل تشویش ہے۔
یہ بھی پڑھیں حکومت کا پی ٹی آئی پر پابندی لگانے اور عمران خان پر آرٹیکل 6 کے تحت ریفرنس لانے کا فیصلہ
انہوں نے کہاکہ لگتا ہے یہ پیچیدہ سیاسی عمل کا آغاز ہے، ہم جمہوری عمل اور وسیع تر اصولوں کی حمایت کرتے ہیں۔
ترجمان نے کہاکہ وسیع تر اصولوں میں قانون کی حکمرانی، قانون کے تحت مساوی انصاف شامل ہے۔
واضح رہے کہ حکومت نے پاکستان تحریک انصاف پر پابندی لگانے کے علاوہ سابق صدر عارف علوی، عمران خان اور قاسم سوری کے خلاف آرٹیکل 6 کی کارروائی چلانے کا فیصلہ کیا ہے۔
وفاقی وزیر اطلاعات عطااللہ تارڑ نے اسلام آباد میں پریس کانفرنس سے خطاب کرتے ہوئے کہا کہ ’ملک کے ساتھ بہت کھلواڑ ہوچکا، اب کہنا چاہتے ہیں کہ ’نومور‘ ۔ ہم اس ملک کو آگے لے کر جانا چاہتے ہیں اور اس کے لیے ہم سمجھتے ہیں کہ کہ اگر اس ملک کو آگے لے کر جانا ہے تو پھر تحریک انصاف اور پاکستان ایک ساتھ نہیں چل سکتے۔
یہ بھی پڑھیں ن لیگ سیکیورٹی تھریٹ، آرٹیکل 6 غیر آئینی حرکتیں کرنے والوں کے خلاف لگنا چاہیے، پاکستان تحریک انصاف
دوسری جانب پی ٹی آئی پر پابندی لگانے کے فیصلے کی جہاں دیگر سیاسی جماعتیں مخالفت کررہی ہیں وہیں مسلم لیگ ن کے اندر سے بھی آوازیں اٹھنا شروع ہوگئی ہیں۔
