سپریم کورٹ کی جانب سے 4 ایڈہاک ججز کی تعیناتی کے لیے مجوزہ فہرست میں شامل ریٹائر جسٹس مشیر عالم نے ’موجودہ سیاسی صورتحال میں اپنی فلاحی سرگرمیوں کے پیش نظر‘ ایڈہاک جج کا عہدہ قبول کرنے سے معذرت کر لی ہے۔
سندھ ہائیکورٹ اور سپریم کورٹ کے سابق جج مشیر عالم نے اس حوالے سے تصدیق کرتے ہوئے بتایا ہے کہ وہ عمر کے اس حصہ میں فلاحی سرگرمیوں میں مصروف ہیں۔ ’20، 22 سال کرلیا کام کافی ہے، اب فلاحی کاموں پر توجہ ہے، اس وقت جو ماحول بنا ہوا ہے میں نہیں سمجھتا کہ دوبارہ عدلیہ کا حصہ بنا جائے۔‘
یہ بھی پڑھیں: سپریم کورٹ: 3 نئے ججز نے حلف اٹھالیا، تعداد 17 ہوگئی
اس حوالے سے جسٹس ریٹائرڈ مشیر عالم نے چیف جسٹس قاضی فائز عیسی کے نام لکھے ایک خط میں ایڈہاک جج کے لیے اپنا نام آنے پر شکریہ ادا کیا ہے، تاہم خط میں کہا گیا ہے کہ موجودہ صورت حال کی روشنی میں انہیں بہت افسوس کے ساتھ کہنا پڑ رہا ہے کہ وہ یہ عہدہ نہیں لے سکتے۔
Regret Ad Hoc Judge SC by Asadullah on Scribd
جسٹس ریٹائرڈ مشیر عالم مزید کہنا ہے کہ جب وہ 2007 میں سندھ ہائی کورٹ کے جج تھے تو انہوں نے ایک آنکھوں کا اسپتال قائم کیا تھا عدلیہ سے ریٹائرمنٹ کے بعد انہوں نے معاشرے کے لیے اپنا ادھورا فلاحی کام دوبارہ شروع کردیا ہے-
واضح رہے کہ جوڈیشیل کمیشن 19 جولائی کو ایڈہاک ججز کے لیے تجویز کردہ ناموں پر غور کرے گا۔
