سری لنکا میں جاری ویمنز ٹی20 ایشیا کپ کا پہلا پاک بھارت میچ دمبولا کرکٹ گراؤنڈ میں کھیلا گیا، پاکستان نے ٹاس جیت کر بھارت کے خلاف پہلے بیٹنگ کرتے ہوئے 19.2 اوورز میں 108 رنز بنائے، 109 رنز کے ہدف کے تعاقب میں بھارت نے جارحانہ بیٹنگ کی اور 14.1 اوورز میں 3 وکٹوں کے نقصان پر 112 رنز بنا کر فتح اپنے نام کی۔
بھارت کی جانب سے سب سے زیادہ سمرتی مندھانا نے 45، شفالی ورما نے 40 اور دیالان ہیمالاتھا نے 14 رنز بنائے۔ جبکہ پاکستان کی جانب سے سیدہ عروب شاہ نے 2 اور نشرہ سندھو نے ایک وکٹ حاصل کی۔
پاکستان کی جانب سے سب سے زیادہ سدرہ امین نے 25 رنز بنائے، طوبیٰ حسن اور فاطمہ ثنا نے 22 رنز کی اننگ کھیلی۔ بھارت کی جانب سے دیپتی شرما نے 3، رینوکا سنگھ، پوجا وستراکاکر اور شریانکا پٹیل نے 2،2 وکٹیں حاصل کیں۔
بھارت اور پاکستان کے درمیان ویمنز ایشیا کپ کے افتتاحی میچ سے قبل ہرمن پریت اور ندا ڈار نے اظہارِ خیال کیا، دونوں ٹیموں کی کپتانوں نے جیت کا عزم ظاہر کیا ہے۔
مزید پڑھیں: ویمنز ٹی 20 ایشیا کپ: پاک بھارت ٹیمیں آج مدِ مقابل ہوں گی
بھارتی ٹیم کی کپتان ہرمن پریت کور کا کہنا تھا کہ یہ ٹورنامنٹ ہمارے لیے بہت اہمیت کا حامل ہے کیونکہ ہم اس کا یکساں احترام کرتے ہیں اور ایشیائی اور عالمی دونوں سطحوں پر سبقت حاصل کرنا چاہتے ہیں۔
انہوں نے کہا کہ ہماری توجہ میں کوئی تبدیلی نہیں ہے، چاہے ہم ٹی 20 ورلڈ کپ کی تیاری کر رہے ہوں یا کسی دوسرے بڑے ٹورنامنٹ کے لیے۔ ہر کھیل اہم ہوتا ہے اور ہم اپنی بہترین کارکردگی دکھانے کی کوشش کرتے ہیں۔
ٹیم پاکستان کی کپتان ندا ڈار نے بھارتی ٹیم کی طاقت اور صلاحیت کو تسلیم کیا اور ان کے تجربات سے سیکھنے کا ارادہ ظاہر کرتے ہوئے کہا کہ ہندوستان کے خلاف کھیلنا ایک قیمتی تجربہ دیتا ہے کیونکہ وہ ٹی20 میں بہترین انداز کے ساتھ کھیلتے ہیں۔ یہ سیریز ہمارے لیے ان سے بہت کچھ سیکھنے کے لیے اہم ہے۔
پاکستان ویمنز کرکٹ ٹیم آج اے سی سی ویمنز ٹی20 ایشیا کپ میں روایتی حریف انڈیا کا مقابلہ کرنے کے لیے پراعتماد دکھائی دیتی ہے۔ 8ٹیموں کا یہ ٹورنامنٹ سری لنکا کے شہر دمبولا کے رانگیری دمبولا انٹرنیشنل اسٹیڈیم میں کھیلا جارہا ہے۔ 8 ٹیموں کو دو گروپس میں تقسیم کیا گیا ہے۔
یہ بھی پڑھیں: پاکستان کی مینز اور ویمنز کرکٹ ٹیمیں آئندہ سال انگلینڈ کا دورہ کریں گی
گروپ اے میں پاکستان، انڈیا، نیپال اور متحدہ عرب امارات کی ٹیمیں شامل ہیں جبکہ گروپ بی میں بنگلہ دیش، ملائیشیا، تھائی لینڈ اور میزبان سری لنکا شامل ہیں۔ ہر گروپ سے 2 ٹاپ ٹیمیں سیمی فائنل میں جگہ بنائیں گی جبکہ فائنل 28 جولائی کو کھیلا جائے گا۔
یاد رہے کہ پی سی بی نے ٹورنامنٹ سے قبل ٹیم مینجمنٹ میں تبدیلی کرتے ہوئے محمد وسیم کو ہیڈ کوچ جبکہ جنید خان اور عبدالرحمن کو بالترتیب اسسٹنٹ اور اسپن بولنگ کوچ مقرر کیا ہے۔
واضح رہے اس سال ٹی20 فارمیٹ میں کھیلا جانے والا ایشیا کپ آج سے شروع ہو رہا ہے، جبکہ خواتین کا ورلڈ کپ اس سال کے آخر میں بنگلہ دیش میں ہوگا۔
پاکستان کے اسکواڈ میں ندا ڈار (کپتان)، عالیہ ریاض، ڈیانا بیگ، فاطمہ ثنا، گل فیروزہ، ارم جاوید، منیبہ علی، نجیہہ علوی، نشرہ سندھو، عمیمہ سہیل، سعدیہ اقبال، سدرہ امین، سیدہ عروب شاہ، تسمیہ رباب اور طوبیٰ حسن شامل ہیں۔
