وزیراعظم پاکستان شہبازشریف نے لائرز ویلفیئر اینڈ پروٹیکشن بل 2023 کی منظوری پر ملک بھر کی وکلاء برادری کو مبارک باد دی ہے۔
اپنے ایک بیان میں انہوں نے کہا کہ اللہ کا شکر ہے کہ وکلاء برادری سے کیا ہوا وعدہ پورا کردیا ہے۔ایک ماہ قبل وکلاء نے مجھ سے ملاقات کی تھی اور میں نے ان سے یہ قانون جلد منظور کرانے کا وعدہ کیا تھا۔
وزیراعظم شہبازشریف کا کہنا تھا کہ وکلاء نے اپنی جانوں کے نذرانے پیش کئے ہیں ، ان کا تحفظ اور فلاح و بہبود ہماری اولین ترجیح ہے، پارلیمنٹ کے دونوں ایوانوں کے ارکان قابل تعریف ہیں جنہوں نے ایک نئی تاریخ لکھی ہے۔
ان کا کہنا تھا کہ سب کے حقوق کے لئے لڑنے والے وکلاء کے اپنے حقوق کے حوالے سے وہ پیش رفت نہیں ہوئی جو ہونی چاہیے تھی۔اب قانون کی منظوری سے وکلاء کو نہ صرف بہتر ماحول فراہم ہوگا بلکہ وہ قانونی تحفظ میں اور بھی بہتر خدمات انجام دے پائیں گے۔
وزیراعظم کا مزید کہنا تھا کہ وکلاء برادری کی بہتری کے لئے ہم اپنا کردار ادا کرتے رہیں گے۔
