قومی کرکٹ ٹیم کے فاسٹ بولر حارث رؤف نے پہلے بچے کی ولادت سے متعلق گردش کرنے والی خبروں پر سخت ردعمل کا اظہار کیا ہے۔
دو روز قبل سوشل میڈیا پر گردش کرنے والی خبروں میں دعویٰ کیا گیا تھا کہ حارث رؤف اور مزنا مسعود کے ہاں پہلے بچے کی پیدائش ہوئی ہے۔
صارفین نے ایک نومولود بچے کی تصویر کو حارث رؤف کا بیٹا قرار دے دیا تھا جس کی کرکٹر نے سختی سے تردید کرتے ہوئے جعلی خبروں کی روک تھام کی درخواست کی ہے۔
حارث رؤف نے سوشل میڈیا پر جاری اپنے خصوصی پیغام میں لکھا کہ ‘میرے بچے سے متعلق پیدائش کی خبریں جھوٹی ہیں، برائے مہربانی جھوٹی خبریں پھیلانے اور ان پر یقین کرنے سے گریز کریں’۔
The news regarding the birth of my child is false. Please avoid spreading and trusting fake news. Any information about my personal life originating from a non-official account is mere rumor !
— Haris Rauf (@HarisRauf14) July 25, 2024
کرکٹر نے مزید لکھا ان کی ذاتی زندگی سے متعلق کوئی بھی معلومات جو کسی غیر مصدقہ سوشل میڈیا اکاؤنٹ پر نظر آئے وہ افواہ کے سوا کچھ نہیں ہو گی۔
واضح رہے کہ فاسٹ بولر حارث رؤف اپنی دیرینہ دوست مزنا مسعود ملک سے دسمبر 2022 میں رشتہ ازدواج میں منسلک ہوئے تھے جب کہ دونوں کی شادی کی تقریبات جولائی 2023 میں ہوئی تھیں۔
