بھارتی کاروباری شخصیت مکیش امبانی کے چھوٹے بیٹے آننت امبانی اور رادھیکا مرچنٹ کی کئی ماہ کے جشن کے بعد شادی ہو گئی لیکن شادی کی تقریبات کا سلسلہ ابھی تھما نہیں بلکہ پارٹی ابھی باقی ہے۔
بھارتی میڈیا رپورٹس کے مطابق مکیش امبانی نے اپنے بیٹے اور بہو کی شادی کے بعد پوسٹ ویڈینگ جشن منانے کے لیے لندن کا 7 اسٹار ہوٹل 2 ماہ کے لیے بُک کروالیا ہے۔
میڈیا رپورٹس کے مطابق اب اننت امبانی اور رادھیکا مرچنٹ کی شادی کی تقریبات لندن میں منعقد کی جائیں گی جو ستمبر تک جاری رہیں گی جس کے لیے مکیش امبانی نے 7 اسٹار اسٹوک پارک ہوٹل کی بُکنگ کی ہے۔
رپورٹس کے مطابق شادی کے جشن کی تقریب میں شہزادہ ہیری، ان کی اہلیہ میگھن مارکل اور سابق برطانوی وزیر اعظم بورس جانسن کی شرکت بھی متوقع ہے جن کی آمد کے پیش نظر سکیورٹی کے سخت انتظامات کیے گئے ہیں۔
یاد رہے کہ اننت امبانی اور رادھیکا مرچنٹ کی شادی کا سلسلہ رواں سال یکم مارچ سے شروع ہوا تھا اور یہ جوڑا 12 جولائی کو شادی کے بندھن میں بندھا، شادی کی مرکزی تقریبات 14 جولائی تک جاری رہیں اور اب شادی کے بعد بھی لندن میں خاص تقریب کا اہتمام کیا گیا ہے۔ ذرائع کے مطابق ان کی شادی کی شاندار تقریب کے لیے 500 ملین ڈالر خرچ کیے گئے۔
