نوشہرو فیروز کے علاقے گل ٹاؤن میں 2 روز قبل خاتون پر والد اور چچا سمیت دیگر رشتے داروں نے تشدد کرکے اس کی دونوں ٹانگیں توڑ دی تھیں۔ ترجمان پولیس کے مطابق مقدمے میں نامزد ملزم غلام مصطفیٰ شاہ کو گرفتار کر لیا گیا ہے، ملزم متاثرہ خاتون کا باپ ہے۔
پولیس کا کہنا ہے کہ گرفتار ملزمان کی تعداد 2 ہوگئی ہے جبکہ 4 ملزمان نے عدالت سے ضمانت لے رکھی ہے۔ عدالت میں خلع کی درخواست دائر کرنے پر خاتون پر تشدد کیا گیا تھا، مقدمے میں 6 ملزمان کو نامزد کیا گیا ہے۔
متاثرہ خاتون ثوبیہ کا بیان
پولیس کے مطابق ثوبیہ کو نواب شاہ کے اسپتال پہنچایا گیا تھا۔ جہاں خاتون نے پولیس کو اپنے بیان میں کہا کہ اس کا شوہر اس پر ہر روز تشدد کرتا ہے اور بیوی بچوں کا خرچ بھی نہیں اٹھاتا۔ اپنے والدین کو بارہا آگاہ کر چکی تھی کہ کس مشکل میں مبتلا ہوں، لیکن والدین میری باتوں کو سنجیدہ نہیں لیتے تھے۔
والد اور چچا نے خلع کی درخواست واپس لینے کے لیے دباؤ ڈالا
ثوبیہ کے مطابق اس نے پر تشدد صورتحال سے نجات پانے کے لیے عدالت سے رجوع کیا اور خلع کی درخواست دائر کی۔ درخواست کے بعد والد اور چچا سمیت دیگر نے درخواست واپس لینے کے لیے دباؤ ڈالا جب میری طرف سے انکار کیا گیا تو مجھے تشدد کا نشانہ بنایا گیا۔
ایس ایس پی نوشہرو فیروز نے واقعہ کا نوٹس لیتے ہوئے ملزموں کو گرفتار کرنے کا حکم دیا تھا، مقامی پولیس نے کارروائی کرتے ہوئے 2 ملزمان کو حراست میں لے لیا ہے۔
