بانی پاکستان تحریکِ انصاف (پی ٹی آئی) عمران خان کی توشہ خانہ ٹو کیس میں سزا معطل کرنے اور ضمانت پر رہائی کے لیے اسلام آباد ہائیکورٹ میں درخواست دائر کردی گئی۔
یہ درخواست بیرسٹر سلمان صفدر اور خالد یوسف چوہدری نے عدالت عالیہ میں دائر کی، جس میں درخواست کی گئی ہے کہ عمران خان کی سزا کو معطل کرکے انہیں ضمانت پر رہا کیا جائے۔
مزید پڑھیں: اپوزیشن احتجاج جاری، اراکین کو پارلیمنٹ کے اندر محبوس رکھا گیا ہے، تحریک تحفظ آئین کا الزام
ساتھ ہی، 190 ملین پاؤنڈ کیس میں بھی سزا معطلی کی درخواست جلد سماعت کے لیے مقرر کرنے کی متفرق درخواست دائر کی گئی ہے۔
اسلام آباد ہائی کورٹ میں دائر درخواست میں کہا گیا ہے کہ توشہ خانہ ٹو کیس میں سزا معطلی کا معاملہ میرٹ اور طبی وجوہات کی بنیاد پر جائز ہے، کیونکہ بانی پی ٹی آئی عمران خان دائیں آنکھ کی سنگین بیماری میں مبتلا ہیں۔
’اس بیماری کی تشخیص پمز کے ڈاکٹر محمد عارف نے کی اور بتایا کہ دائیں آنکھ شدید متاثر ہو چکی ہے اور بینائی صرف 15 فیصد رہ گئی ہے، جبکہ جیل کے اندر اس کا علاج ممکن نہیں۔ درخواست میں عمر 73 سال کے عمران خان کے لیے ضمانت کی استدعا بھی کی گئی ہے۔‘
بعد ازاں میڈیا سے گفتگو میں بیرسٹر سلمان صفدر نے کہاکہ بانی پی ٹی آئی عمران خان کے کیسز آئندہ ہفتے کی سماعت کے لیے مقرر کیے جائیں گے۔
انہوں نے کہاکہ عمران خان کی آنکھ کی حالت کے پیش نظر جلد سماعت کی درخواست دائر کی گئی ہے۔
مزید پڑھیں: عمران خان کا چھپ کر علاج کروانا قابل قبول نہیں، علیمہ خان پھٹ پڑیں
انہوں نے مزید کہاکہ بشریٰ بی بی جو ایک خاتون ہیں، کو گزشتہ ایک سال سے ضمانت نہیں ملی، اور درخواست کی گئی ہے کہ پیر کے روز دونوں کی ضمانت کی درخواستوں کی سماعت ہو۔
