دولت مشترکہ کی سیکریٹری جنرل پہلے سرکاری دورے پر پاکستان پہنچ گئیں۔ پاکستان کی جانب سے یورپ کے لیے ایڈیشنل سیکریٹری خارجہ شفقت علی خان نے ہوائی اڈے پر معزز مہمان کا استقبال کیا۔ سیکریٹری جنرل پیٹریشیا سکاٹ لینڈ حکومت پاکستان کی دعوت پر پاکستان کا پہلا سرکاری دورہ کر رہی ہیں۔
سیکریٹری جنرل پیٹریشیا سکاٹ لینڈ اپنے 5 روزہ دورے کے دوران پاکستان کی قیادت، کابینہ کے ارکان، نوجوان رہنماؤں، سول سوسائٹی کے نمائندوں اور دیگر اسٹیک ہولڈرز سے ملاقاتیں کریں گی۔ سیکیریٹری جنرل 2022 کے تباہ کن سیلاب اور موسمیاتی تبدیلی کے منفی اثرات سے نمٹنے کے لیے پاکستان کے ساتھ یکجہتی کا اعادہ کریں گی۔
مزید پڑھیں:سیلاب سے پاکستان کو جو نقصان ہوا اس کا ازالہ آئندہ سالوں میں بھی نہ ہوسکے گا، شہباز شریف
سیکریٹری جنرل، پاکستان اور دولت مشترکہ کے درمیان مشترکہ مفاد کے دیگر شعبوں میں تعاون بڑھانے کےحوالے سے بھی بات کریں گی، جن میں پاکستان کے ترقیاتی منصوبے، نوجوانوں کو بااختیار بنانے، تجارت اور سرمایہ کاری کو فروغ دینا شامل ہے۔
