پاکستان ایئر لائن (پی آئی اے) نے فیصل آباد سے جدہ کے لیے براہ راست پروازوں کا آغاز کردیا ہے جس سے عمرہ زائرین کو خصوصی سہولیات میسر آئیں گی۔
ترجمان پاکستان ایئر لائن نے جمعہ کو اعلان کیا کہ قومی ایئرلائن نے فیصل آباد سے سعودی عرب کے شہر جدہ کے لیے براہ راست پروازوں کا آغاز کر دیا ہے۔
یہ بھی پڑھیں:کوئٹہ سے جدہ، پی آئی اے کی خصوصی پروازوں کا آغاز اگست میں ہوگا
ترجمان کے مطابق پی آئی اے نے فیصل آباد سے جدہ کے لیے 2 طرفہ پروازوں کا آغاز کیا ہے جس کے تحت ہفتے میں 2 پروازیں فیصل آباد سے براہ راست جدہ کے لیے روانہ ہوں گی، ان پروازوں کی دوبارہ شروعات سے خاص طور پر عمرہ زائرین کو خصوصی سہولیات دستیاب ہوں گی۔
ترجمان نے بتایا کہ پہلی پرواز پی کے 763 سے 170 عازمین عمرہ کو چیف کمرشل آفیسر نوشیروان عادل نے رخصت کیا، اس موقع پر نوشیروان عادل نے کہا کہ پی آئی اے اپنے مسافروں کو براہ راست سفری سہولیات کی فراہمی کے لیے ہمیشہ کوشاں رہتی ہے۔
مزید پڑھیں:پی آئی اے نے فیصل آباد اور کراچی کے درمیان فضائی رابطہ بحال کردیا
انہوں نے بتایا کہ فیصل آباد سے جدہ کے لیے براہ راست پروازوں کے آغاز سے سعودی عرب میں روزگار کے سلسلے میں مقیم افراد کو بھی وطن واپسی کے لیے براہ راست اپنے آبائی علاقے میں پہچنے کے لیے سفر کی سہولت میسر آئے گی۔
یہ بھی پڑھیں:حکومتی اقدامات سے مہنگائی کم ہوئی، پی آئی اے کی نجکاری ہوکر رہے گی، مصدق ملک
نوشیروان نے بتایا کہ فیصل آباد کی کاروباری برادری نے بھی پی آئی اے کی جدہ کے لیے براہ راست پروازوں کا خیر مقدم کیا ہے۔ مسافروں کی جدہ روانگی کے موقع پر ایئر پورٹ پر پی آئی اے کے ڈسٹرکٹ مینیجر شاہد حسین، سٹیشن مینیجر محمد عرفان، دیگر ایجنسیوں کے افسران بھی موجود تھے۔
