انگلینڈ کے کرکٹر جیمز اینڈرسن کو اس بات پر خاصی حیرانی ہے کہ پاکستان کرکٹ ٹیم کے کپتان بابر اعظم اس سال کے دی ہنڈریڈ ڈرافٹ کے لیے فروخت کیوں نہیں ہوئے۔
دی انڈین ایکسپریس کے مطابق بی بی سی کے ٹیلنڈر پوڈ کاسٹ میں گفتگو کرتے ہوئے جیمز اینڈرسن نے کہا کہ وہ ہوتے تو بابر اعظم کو اپنی ٹیم میں لینے کے لیے پورا بجٹ صرف کر دیتے۔
جیمز اینڈرسن کا کہنا تھا کہ ان کی سمجھ میں بابر اعظم کو منتخب نہ کرنے کی صرف ایک ہی وجہ آتی ہے وہ یہ کہ غالباً وہ اپنی مصروفیات کے باعث دی ہنڈیرڈ ڈرافٹ کے لیے دستیاب نہیں ہوں گے اس لیے انہیں نہیں لیا گیا۔
Jimmy Anderson and the @TailendersPod are baffled as to why #BabarAzam𓃵 was not picked in the @thehundred draft pic.twitter.com/uKPZU5wSER
— Faraz Qasim (@farazqasim) March 30, 2023
بابر اعظم ایک لاکھ پاؤنڈ کی ریزرو قیمت کے ساتھ ڈرافٹ میں داخل ہوئے تھے تاہم ان کا کسی نے انتخاب نہیں کیا۔
پچھلے سال کے ڈرافٹ میں بھی بابر کو منتخب نہیں کیا گیا تھا کیوں کہ یہ ٹورنامنٹ پاکستان کے بین الاقوامی میچز سے متصادم تھا۔ بابر اعظم کو سوا لاکھ پاؤنڈ کی ریزرو قیمت پر درج کیا گیا تھا۔
اس مرتبہ بابر اعظم کے علاوہ پاکستان کے مایہ ناز کرکٹر محمد رضوان بھی ٹیمیں تلاش کرنے میں ناکام رہے۔
دی ہنڈریڈ میں فی اننگز 100 گیندیں ہوتی ہیں جو ٹی 20 کے مقابلے میں 20 گیندیں کم ہے۔ اس کا دورانیہ ڈھائی گھنٹے ہوتا ہے۔ برطانیہ میں ہونے والے اس ٹورنامنٹ میں آٹھ ٹیمیں حصہ لے رہی ہیں۔
