پاک فوج نے یوم شہدا پولیس کے موقع پر وطن کی خاطر اپنی جانوں قربانیاں دینے والے پولیس کے بہادر جوانوں کو خراج عقیدت پیش کیا ہے۔
پاک فوج کے شعبہ تعلقات عامہ (آئی ایس پی آر) کے مطابق پولیس کے جوانوں نے فرض کی ادائیگی میں لازوال قربانیاں دیں، ان کی غیر متزلزل لگن، بے لوث ہمت اور قربانی کو ہمیشہ یاد رکھا جائے گا۔
یہ بھی پڑھیں پولیس نے دہشتگردی کے خلاف جنگ میں ہراول دستے کی ذمہ داری نبھائی، وزیراعظم شہباز شریف
آئی ایس پی آر نے کہاکہ مسلح افواج ان شہیدوں کو یاد کرتی ہے جنہوں نے اپنے پسینے اور خون سے قوم کی حفاظت کی۔ ان کی عظیم اور بے لوث خدمات نے قوم کی حفاظت کو یقینی بنایا۔
فوج کے شعبہ تعلقات عامہ نے کہاکہ ہم شہدا کے خاندانوں کے ساتھ یکجہتی کے ساتھ کھڑے ہیں اور ہر ممکن طریقے سے ان کی حمایت کرنے کے اپنے عزم کا اعادہ کرتے ہیں۔
آئی ایس پی آر کے مطابق پولیس کے شہدا کے ساتھ اپنی یکجہتی کے اظہار کے لیے فوجی افسران اور دستوں نے ملک بھر میں متعدد مقامات پر مقامی پولیس کے زیراہتمام مختلف تقریبات میں شرکت کی۔
فوج کے شعبہ تعلقات عامہ نے کہاکہ یوم شہدا پولیس امن، انصاف اور سلامتی کے حصول میں ہمارے پولیس اہلکاروں کی بے پناہ قربانیوں کی ایک پُرجوش یاد دلاتا ہے۔
یہ بھی پڑھیں شہداء پولیس کی بے لوث قربانیاں ہمیشہ یاد رکھنے کا عزم
آئی ایس پی آر نے کہاکہ پاکستان کی مسلح افواج اس عزم کا اعادہ کرتی ہیں کہ پولیس اور دیگر قانون نافذ کرنے والے اداروں کے شانہ بشانہ مادر وطن کے دفاع کے لیے اپنا کردار جاری رکھا جائے گا۔
