پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل احمد شریف نے ایک بار پھر 9 مئی کے واقعات پر لب کشائی کرتے ہوئے کہا ہے کہ فوج کا 9 مئی کے واقعات پر موقف بالکل واضح ہے، جس میں کوئی تبدیلی نہیں آئے گی۔
راولپنڈی میں پریس کانفرنس کرتے ہوئے انہوں نے کہاکہ 9 مئی کے واقعات پر فوج نے رواں برس 7 مئی کو اپنا موقف واضح کردیا تھا۔
یہ بھی پڑھیں 9 مئی واقعات پر فوج کے واضح مؤقف میں تبدیلی آئی اور نہ آئے گی، ڈی جی آئی ایس پی آر
ڈی جی آئی ایس پی آر کی پریس کانفرنس کے بعد سوال یہ اٹھ رہا ہے کہ 7 مئی کی پریس کانفرنس میں آخر انہوں نے 9 مئی کے واقعات کے حوالے سے کیا موقف اختیار کیا تھا۔
واضح رہے کہ 7 مئی 2024 کو پریس کانفرنس کرتے ہوئے ڈی جی آئی ایس پی آر میجر جنرل احمد شریف چوہدری نے کہا تھا کہ 9 مئی صرف افواج پاکستان کا نہیں پوری عوام کا مقدمہ ہے، نظام انصاف پر یقین رکھنا ہے تو 9 مئی کے ملزموں کو سزا دینا ہوگی۔
ڈی جی آئی ایس پی آر کے مطابق 9 مئی کا واقعہ کوئی ڈھکی چھپی چیز نہیں، عوام اور فوج نے تمام واقعات دیکھے ہیں، سب نے دیکھا کہ کس طرح لوگوں کی ذہن سازی کی گئی اور انہیں حملوں کے اہداف دیے گئے، چند گھنٹوں میں پورے ملک میں فوجی تنصیبات پر حملے ہوئے۔
یہ بھی پڑھیں 9 مئی کو فوج کا تختہ الٹنے کی کوشش کی گئی، شہباز شریف
ڈی جی آئی ایس پی آر کا کہنا تھا کہ 9 مئی کے بعد عوام انتشاری ٹولے سے پیچھے ہٹ گئی، جھوٹ اور فریب مزید نہیں چل سکتا، جب سچ سامنے آگیا تو فالس فلیگ آپریشن کا دوسرا جھوٹ شروع کر دیا گیا، آپ لوگوں کو کچھ وقت کے لیے بیوقوف بناسکتے ہیں ہمیشہ کے لیے نہیں۔
انہوں نے کہا تھا کہ 9 مئی کے واقعات سے عوام اور فوج میں نفرت پیدا کرنے کی کوشش کی گئی، عوام کو بے وقوف سمجھنے کی اجازت نہیں دی جا سکتی، جوڈیشل کمیشن بنانے کا کہا جاتا ہے، جوڈیشل کمیشن اس معاملے پر بنتا ہے جہاں ابہام ہو، جوڈیشل کمیشن بنائیں اور واقعے کی تہہ تک جائیں۔
یہ بھی پڑھیں 9 مئی کے منصوبہ سازوں کو ڈھیل دی جائے گی تو فسطائیت بڑھے گی، ڈی جی آئی ایس پی آر
ڈی جی آئی ایس پی آر نے کہا تھا کہ سیاسی انتشاری ٹولے کے لیے ایک ہی راستہ ہے کہ وہ عوام سے معافی مانگے، ایسے سیاسی انتشاری ٹولے کے ساتھ کوئی بات چیت نہیں ہوسکتی، آئین میں واضح ہے ملکی سلامتی پر وار نہیں کیا جا سکتا، اسی طرح آئین پاکستان ریاست کے خلاف پروپیگنڈے کی اجازت نہیں دیتا۔
