سینیٹ کے اجلاس میں حماس کے سیاسی ونگ کے رہنما اسماعیل ہنیہ کی شہادت پر متفقہ طور پر قرارداد منظور کرلی گئی جس میں اسلامی ممالک سے متحد ہوکر غزہ پر اسرائیل کی ببماری رکوانے اور علاقے سے صیہونی قبضہ ختم کرانے کا مطالبہ کیا گیا۔
یہ بھی پڑھیں: اسماعیل ہنیہ پر حملہ کیسے ہوا؟ عینی شاہد نے سب بتا دیا
چئیرمین سینیٹ سید یوسف رضاگیلانی کی زیرصدارت اجلاس میں اسماعیل ہانیہ کی شہادت پر سینیٹر پلوشہ خان نے قرارداد پیش کی جو متفقہ طور پر منظور کرلی گئی۔
سینیٹ نے صہیونی حملے میں اسماعیل ہانیہ کی شہادت پر گہرے رنج و غم کا اظہار کرتے ہوئے کہا کہ ایوان اسرائیلی حملوں میں فلسطینیوں کی شہادت اور انسانی حقوق کی پامالیوں کی مذمت کرتا ہے۔
قرارداد میں کہا گیا کہ یہ ایوان اسرائیل کی جانب سے انسانی حقوق کی خلاف ورزیوں، بیروت میں بلا اشتعال بمباری اور فلسطین میں ہزاروں دیگر افراد کے علاوہ 250 معصوم شہریوں کی ہلاکت کی مذمت کرتا ہے۔
ایوان نے کہا کہ اسرائیل ایک بین الاقوامی مجرم اور دہشتگرد ریاست کا روپ دھار رہا ہے اور بلاوجہ مسلمان ملکوں پر حملہ آور ہے۔
مزید پڑھیے: غزہ جنگ: امریکا میں 6 ماہ کے دوران مسلم مخالف واقعات میں 70 فیصد اضافہ ریکارڈ
قرارداد میں کہا گیا کہ اسرائیل ایک بین الاقوامی مجرم اور دہشت گرد ریاست کا روپ دھار رہا ہے جس کے لیے ضرورت ہے کہ اوآئی سی اور پاکستان سمیت تمام اسلامی ممالک متحد ہوکر اسرائیل کی دہشت گرد کارروائیاں رکوائیں۔
سینیٹ نے زور دیا کہ اسلامی ممالک مل کر فلسطینی مسلمانوں پر ہونے والی بمباری کو فوری طور پر رکوائیں اور غزہ کا محاصرہ ختم کروائیں تا کہ محصور اور خوراک و طبی سہولیات کے لیے تڑپتے فلسطینیوں تک ہنگامی امداد پہنچ سکے۔
