صدر مملکت آصف علی زرداری نے کہا ہے کہ ہم پڑوسی کی جنگ میں پڑنے کے نتائج کا اندازہ نہیں لگا سکے۔
اقلیتوں کے قومی دن کی مناسبت سے منعقدہ تقریب سے خطاب کرتے ہوئے آصف زرداری نے کہاکہ ہم نے شہریوں کے حقوق کے تحفظ کا حلف اٹھایا ہے، اس دن کو منانے کا مقصد یہ ہے کہ پاکستان کی ترقی کے لیے کردار ادا کرنے والے مختلف مذاہب کے لوگوں کو خراج تحسین پیش کیا جائے۔
یہ بھی پڑھیں ہتھیار ڈالنے والے کچے کے ڈاکوؤں کو قومی دھارے میں لایا جائے، صدر آصف زرداری
آصف زرداری نے کہاکہ جو کچھ 1971 میں ہوا اس کا گواہ ہوں۔ تب ہمیں کمزور کرکے ایک پڑوسی ملک کی جنگ میں دھکیل دیا گیا، تب ہم اندازہ نہیں لگا سکے کہ اس کے نقصانات کیا ہوں گے، یہ ہماری غلطی ہے۔
آصف زرداری نے کہاکہ ہمارے پڑوسی ملک بھارت میں اقلیتیں غیرمحفوظ ہیں، جبکہ پاکستان میں اقلیت برابر کے شہری ہیں۔
انہوں نے کہاکہ قائداعظم محمد علی جناح نے ایک سوچ کے تحت پاکستان بنایا، آج مدارس میں اپنی سمجھ کے حساب سے مذہب کے بارے میں پڑھایا جاتا ہے۔
یہ بھی پڑھیں صدر آصف زرداری کا پاک چین تعلقات کے فروغ کے لیے عوامی رابطوں کو مستحکم کرنے پر زور
آصف زرداری نے کہاکہ غزہ میں میزائل برسانے والے یہ نہیں دیکھ رہے کہ یہ کس پر لگ رہا ہے۔
انہوں نے کہاکہ میں نے بابائے قوم قائداعظم محمد علی جناح کی قبر پر وعدہ کیا تھا کہ ہم پاکستان کے مفادات کو سنبھال کررکھیں گے۔
