وزیرصنعت و پیداوار رانا تنویر حسین کی زیر صدارت شوگر ایڈوائزری بورڈ کے اجلاس میں تاجکستان کو 40 ہزار میٹرک ٹن چینی برآمد کرنے کی سفارش کردی گئی۔
اجلاس کے بعد جاری کیے گئے اعلامیے کے مطابق ملک میں چینی کے اسٹاک کی دستیابی اور قیمتوں کا جائزہ لیا گیا، تاجکستان کو چینی کی برآمد گورنمنٹ ٹو گورنمنٹ کی سطح پر ہوگی۔
یہ بھی پڑھیں جہانگیر ترین کی شوگر ملز کو چینی برآمد کرنے کا سب سے بڑا کوٹہ الاٹ
اعلامیہ میں کہا گیا ہے کہ چینی کی ریٹیل قیمت کو برآمد سے الگ کرنے فیصلہ کیا گیا ہے، شوگر ملز ایسوسی ایشن سے ریٹیل پرائس کا کوئی تعلق نہیں۔
وزیر صنعت رانا تنویر حسین نے کہاکہ شوگر ملز مالکان کی جانب سے گنے کے باقی کاشتکاروں کو بقایا جات کی ادائیگی جلد کی جائے گی۔
انہوں نے کہاکہ ضلعی انتظامیہ کی جانب سے چینی کی ریٹیل قیمت کو کنٹرول کیا جائے گا۔
اجلاس کو بریفنگ دی گئی کہ اس وقت ملک میں چینی کا 28 لاکھ میٹرک ٹن اسٹاک موجود ہے، اور چینی سرپلس ہے۔
یہ بھی پڑھیں کوئٹہ : کسٹمز کی کارروائی، 1لاکھ 30 ہزار کلو گرام چینی برآمد
اعلامیہ کے مطابق ایف بی آر اور کین کمشنرز ملک میں چینی کے اسٹاک کی دستیابی کو دوبارہ چیک کریں گے، اور آئندہ اجلاس میں مصالحتی رپورٹ پیش کی جائے گی، اور اضافی چینی برآمد کرنے کا فیصلہ رپورٹ کی روشنی میں کیا جائے گا۔
