وزیر دفاع خواجہ آصف نے کہا کہ کوئی نیا تنازع نہیں کھڑا کرنا چاہتا ہوں، ملک احمد میرے چھوٹے بھائی ہیں اور بیٹوں کی جگہ ہیں، ان سے مشورہ کرکے ہی کوئی بات کروں گا۔
لاہور میں میڈیا سے گفتگو کے دوران صحافی نے خواجہ آصف سے اسپیکر پنجاب اسمبلی ملک احمد خان کے آج کے بیان سے متعلق سوال کرتے ہوئے پوچھا کہ آپ بھی تو ہر وقت ان کے ساتھ ہی ہوا کرتے تھے، جس پر خواجہ آصف نے کہا کہ وہ میرے چھوٹے بھائی ہیں۔
مزید پڑھیں: جنرل باجوہ نے ایکسٹینشن لینے سے واضح انکار کردیا تھا، ملک احمد خان کی گواہی
خواجہ آصف نے کہا کہ ملک احمد خان سے مشورہ کروں گا، ان کے مشورے سے بات کروں گا، کوئی نیا تنازع نہیں کھڑا کرنا چاہتا اور ان کے حوالے سے زیادہ بات نہیں کرنا چاہتا۔
پارٹی کے مشاورتی اجلاس سے متعلق بات کرتے ہوئے صحافی نے سوال کیا کہ کیا حکومت گر رہی ہے، وزیر دفاع خواجہ آصف بولے کہ ایسا کچھ بھی نہیں ہے اپوزیشن نے خود کو حوصلہ بھی تو دینا ہوتا ہے۔
انہوں نے کہا کہ آج کے مشاورتی اجلاس میں آئی ایس آئی کے سابق سربراہ جنرل فیض حمید کی گرفتاری سے متعلق کوئی بات نہیں ہوئی۔
واضح رہے ملک احمد خان نے سابق آرمی چیف جنرل قمر جاوید باجوہ کی ایکسٹینشن سے متعلق انکشاف کرتے ہوئے کہا کہ نیشنل ڈیفنس یونیورسٹی میں ایک تقریب ہوئی وہاں جنرل باجوہ نے کہا میں کوئی ایکسٹینشن نہیں مانگ رہا۔
یہ بھی پڑھیں: جنرل باجوہ نے کہا تھا کہ عاصم منیر اور فیض حمید کی جگہ کسی اور کو آرمی چیف بنالیتے ہیں، خواجہ آصف
انہوں نے کہا کہ ان دنوں حالات ایسے تھے، عمران خان کی حکومت ختم ہوئی تھی، 29 نومبر کو جنرل (ر) باجوہ کی ریٹائرمنٹ کے دن پنڈی میں جی ایچ کیو کے باہر ایک دھرنا بھی بیٹھا تھا، اس وقت بھی جنرل باجوہ نے واضح کہا تھا کہ وہ ایکسٹینشن نہیں لیں گے۔
