اسلام آباد ہائیکورٹ نے انٹرنیٹ کی سست روی اور فائر وال کی تنصیب کے خلاف سینئر صحافی حامد میر کی درخواست پر رجسٹرار آفس کے اعتراضات مسترد کرتے ہوئے، درخواست کو کل سماعت کے لیے مقرر کرنے کی ہدایت کی ہے۔
رجسٹرار آفس کے اعتراضات پر سماعت چیف جسٹس عامر فاروق نے کی۔ ایڈووکیٹ ایمان مزاری نے کہا کہ درخواست پر رجسڑار آفس نے اعتراض عائد کر رکھا ہے۔ عدالت نے کہا 3 اعتراضات کو جوڈیشل سائیڈ پر دیکھیں گے، چوتھا اعتراض درخواست میں نامناسب زبان کے استعمال کا ہے۔
مزید پڑھیں:انٹرنیٹ فائروال سسٹم کی تنصیب کا فیصلہ عمران خان کے دورِ حکومت میں ہوا، خط منظر عام پر آگیا
وکیل ایمان مزاری نے کہا کہ ہم نے صرف ٹوئیٹ درخواست کے ساتھ لگایا ہے، اس میں نامناسب زبان استعمال نہیں کی گئی، عدالت سے استدعا ہے کہ کل ہی کیس سماعت کے لیے مقرر کیا جائے۔
عدالت نے حامد میر کے وکیل کی استدعا منظور کرتے ہوئے کل کیس سماعت کے لیے مقرر کرنے کی ہدایت کرتے ہوئے فریقین کو نوٹس جاری کر دیے ہیں۔
