گزشتہ 24 گھنٹے کے دوران ملک میں دوسری بار زلزلہ آیا ہے جس کے جھٹکے اسلام آباد، پنجاب اور خیبرپختونخوا کے مختلف علاقوں میں محسوس کئے گئے ہیں،ریکٹر اسکیل پر زلزلے کی شدت 5.4 ریکارڈ کی گئی ہے۔
زلزلہ پیما مرکز کے مطابق، زلزلے کے جھٹکے افغانستان اور تاجکستان کے سرحدی علاقوں میں بھی محسوس کیے گئے، زلزلے کی گہرائی 92 کلومیٹر تھی اور اس کا مرکز افغانستان کو ہندوکش ریجن تھا۔
یہ بھی پڑھیں: کوئٹہ، ژوب میں زلزلے کے جھٹکے، شدت 4.2 ریکارڈ
ابتدائی اطلاعات کے مطابق، زلزلے کے جھٹکے اسلام آباد، راولپنڈی اور گردونواح کے علاقوں میں محسوس کیے گئے۔ خیبرپختونخوا میں پشاور، بٹگرام، سوات، مردان، ملاکنڈ، چارسدہ، نوشہرہ، صوابی، اپردیر، ایبٹ آباد، سانگلہ ہل اور شمالی وزیرستان میں بھی زلزلے کے جھٹکے محسوس کیے گئے۔
پنجاب میں زلزلے کے جھٹکے لاہور، جھنگ، فیصل آباد، اٹک، کلورکوٹ، کندیاں اور پھالیہ کے گردونواح کے علاقوں میں محسوس کیے گئے۔ آزاد کشمیر میں وادی نیلم، اٹھمقام، کیرن، اپر نیلم، کنڈل شاہی، کٹن اور جاگراں، شاردہ، کیل اور وادی گریس میں زلزلے کے جھٹکے محسوس کیے گئے ہیں۔ زلزلوں کے باعث خوف و ہراس پھیل گیا اور لوگ گھروں سے باہر نکل آئے۔
