نیشنل ڈیزاسٹر مینجمنٹ اتھارٹی کے نیشنل امرجنسی آپریشن سینٹرکی جانب سے سندھ میں سمندری طوفان کا الرٹ جاری کردیا۔
یہ بھی پڑھیں: کل سندھ کے کون کون سے علاقوں میں اسکول بند رہیں گے؟
این ڈی ایم اے نے سندھ کے ساحلی علاقوں میں طوفان اور شدید بارشوں کی پیش گوئی کرتے ہوئے کہا ہے کہ بھارت کی طرف سے پاکستان میں داخل ہونے والےسسٹم کے زیر اثرطوفانی بارشوں کاامکان ہے۔
تھرپارکر، بدین، ٹھٹھہ، سجاول، حیدر آباد، ٹنڈو محمد خان اور ٹنڈو اللہ یار، میرپور خاص،سانگھڑ، جامشورو، دادو اور شہید بینظیر آباد ، عمرکوٹ اور مٹیاری میں طوفانی بارشوں کا امکان ظاہر کیا گیا ہے۔
طوفان کے نتیجے میں شہروں میں سیلابی صورتحال کا خدشہ ہے جبکہ موسلا دھار بارشوں سے بلوچستان کے ندی نالوں میں بھی سیلابی صورتحال کاامکان ہے۔
مزید پڑھیے: بحیرہ عرب میں ممکنہ طوفان کے باعث ٹروپیکل سائیکلون الرٹ جاری
این ڈی ایم اے کا کہنا ہے کہ کراچی سےتقریباً 277 کلومیٹرجنوب مشرق میں طاقت وارسسٹم برقرارہے اور امکان ہے کہ سسٹم مغرب اورجنوب مغرب کی طرف بڑھنے سے طوفان میں تبدیل ہوجائے گا۔
اسکولوں میں تعطیل
بارشوں کے باعث کراچی میں جمعے تمام سرکاری اور نجی اسکول کل بند رہیں گے۔
اس حوالے سے کمشنر کراچی نے حکم نامہ جاری کردیا ہے۔
حیدرآباد ضلع میں جہاں جمعرات کو تمام تعلیمی ادارے بند تھے وہاں جمعے کو تعطیل جاری رکھنے کا اعلان کیا گیا ہے۔
مزید پڑھیں: لینڈ سلائیڈنگ، فلڈنگ کے بڑھتے خدشات: مظفرآباد میں کل تعلیمی ادارے بند رہیں گے
علاوہ ازیں دیگر اضلاع سانگھڑ، نواب شاہ، جامشورو، ٹنڈوالہ یار، میرپورخاص اور عمرکوٹ میں پہلے ہی تعلیمی ادارے جمعرات اور جمعے کو بند رکھنے کا اعلان کیا جاچکا ہے۔
دوسری جانب آزاد کشمیر میں بھی بارشوں کے باعث سرکاری اور نجی تعلیمی ادارے جمعے کو بند رہیں گے۔
