وزیرخارجہ بلاول بھٹو زرداری کے بیان پر تحریک انصاف کا ردعمل سامنے آگیا ہے۔
پاکستان تحریک انصاف (پی ٹی آئی ) کے مرکزی رہنماء مراد سعید نے کہا ہے کہ پوری قوم چیف جسٹس اور اپنی عدلیہ کے ساتھ کھڑی اور فیصلے کی منتظر ہے۔
مراد سعید نے کہا کہ دستورِ پاکستان واحد متفقہ قومی دستاویز ہے، آئین سازی کا کریڈٹ لینے والے ذوالفقار بھٹو کا نواسہ دستور شکنوں کا سہولت کار ہے۔
مراد سعید کا کہنا تھا کہ 18 ویں آئینی ترمیم کو اپنا کارنامہ بتانے والوں نے صوبائی خودمختاری کا جنازہ نکال دیا ہے۔
انہوں نے کہا کہ دستور، جمہوریت اور پارلیمان کو پیروں تلے روند کر زرداری کا بیٹا ”نظریہ ضرورت“ زندہ کرنے کیلئے ایڑی چوٹی کا زور لگا رہا ہے۔
مراد سعید کا کہنا تھا کہ مجرموں نے ریاست کی ساری قوت جمہور کو کچلنے اور سپریم کورٹ کو نکیل ڈالنے میں کھپا دی ہے۔
پی ٹی آئی رہنما نے کہا کہ امپورٹڈ کٹھ پتلیاں اپنے سلیکٹرز اور ہینڈلرز کے ساتھ مل کر انتخاب سے فرار کیلیے ہاتھ پاؤں مار رہی ہیں لیکن پوری قوم آج نظریہ ضرورت کے خلاف دستور کے تحفظ کے لیے کھڑی ہے۔
انہوں نے کہا کہ معیشت کو تباہ کرکے اور پاکستان کو بدترین انتشار میں جھونک کر اسرائیل سے تعلقات کے قیام کی شرمناک کوششیں کی جارہی ہیں۔
مراد سعید نے کہا کہ کشمیر پر سودے بازی اور اسرائیل پر قائداعظم کے مؤقف سے یکطرفہ فرار رجیم چینج سازش کے کلیدی اہداف میں سے ایک ہے۔
ان کا کہنا تھا کہ حکمران سپریم کورٹ میں سماعت کے دوران انتخاب سے فرار کے حق میں ڈھنگ کی ایک دلیل پیش نہیں کر سکے۔
سابق وفاقی وزیر نے کہا کہ پاکستان کو لاقانونیت کی اندھی وادی میں دھکیلنے کی ہر سازش کا ڈٹ کر مقابلہ کریں گے۔
واضح رہے کہ وزیر خارجہ بلاول بھٹو نے لاڑکانہ میں میڈیا سے گفتگو کرتے ہوئے کہا تھا کہ اگر الیکشن التوا کے معاملے پر سپریم کورٹ کا فل کورٹ تشکیل نہ دیا گیا تو آئینی بحران کے باعث ایمرجنسی یا مارشل لا لگنے کا خدشہ ہے۔
