دنیا کے سب سے بڑے سرچ انجن ’گوگل‘ نے اخراجات میں کمی لانے کی غرض سے ملازمین کی مراعات کم کر دیں۔
میڈیا رپورٹس کے مطابق گوگل نے اپنے اخراجات میں کمی کے اقدامات کا اعلان کیا ہے اور آرٹیفیشل انٹیلی جنس( اے آئی ) کے شعبے کو ترجیح دینے سمیت دیگر ضروری شعبوں پر توجہ دینے کا فیصلہ کیا ہے۔
گوگل کے چیف فنانشل آفیسر روتھ پوراٹ اور کمپنی کے سرچ لیڈ پربھاکر راگھوان نے ایک میمو جاری کیا ہے جس میں لکھا تھا کہ چیلنجنگ معاشی حالات اور ٹیکنالوجی کو آگے بڑھانے کے لیے دستیاب سرمایہ کاری کے باعث اے آئی کے شعبے میں کام کو ترجیح دینا ضروری ہے۔ جس پر تمام لوگوں نے دستخط کر دیئے۔
گوگل اپنی کارکردگی بڑھانے اور اخراجات میں کمی لانے کے لیے دفتر کے اندر فراہم کردہ سہولتوں میں تبدیلیاں کر رہا ہے۔ میمو کے مطابق کمپنی اپنے کیفے، مائیکرو کچن اور دیگر سہولیات کواستعمال کی حد تک محدود کرنے کا ارادہ رکھتی ہے۔
گوگل کی طرف سے اخراجات میں کمی کے حالیہ اقدامات کا اعلان تقریباً 12,000 ملازمین کی برطرفی کے چند ماہ بعد سامنے آیا ہے۔ کمپنی انتظامیہ کے مطابق یہ اقدام عالمی معاشی حالات کے باعث اٹھایا گیا ہے۔
گوگل کے سی ای او سندر پچائی نے ایک میمو میں تسلیم کیا کہ موجودہ معاشی حقیقت مختلف ہے اور اس کے نتیجے میں مشکل فیصلے کرنے پڑے۔ انہوں نے اس بات پر بھی افسوس کا اظہار کیا کہ یہ تبدیلیاں گوگلرز کی زندگیوں پر اثر انداز ہوں گی۔
