پاکستان شوبز انڈسٹری کے لیجنڈ اداکار توقیر ناصر نے اداکارہ صبا قمر کو آڈیشن میں مسترد کرنے کا انکشاف کیا ہے۔
حال ہی میں توقیر ناصر نے ٹیلی ویژن پروگرام میں شرکت کی جہاں انہوں نے اپنے کیریئر کے حوالے سے مختلف پہلوؤں پر تبادلہ خیال کیا اور ساتھ ساتھ اداکارہ صبا قمر کے انڈسٹری میں ابتدائی دنوں کا احوال بھی بیان کردیا۔
توقیر ناصر نے اداکارہ صبا قمر کے آڈیشن کے دنوں کو یاد کرتے ہوئے انکشاف کیا کہ صبا قمر آج ایک ورسٹائل اور پاکستان کی بہترین اداکاراؤں میں سے ایک ہیں لیکن وہ ماضی میں اتنی غیر معمولی اداکارہ نہیں تھیں۔
اداکارہ کے بارے میں بات کرتے ہوئے توقیر ناصر نے اعتراف کیا کہ صبا قمر کو آڈیشن کے دوران انہوں نے مسترد کیا تھا۔ ان کے مطابق انہوں نے ایک ڈرامے کے لیے متعدد اداکاروں کے آڈیشن لیے تھے جن میں صبا قمر بھی شامل تھیں تاہم انہوں نے صبا قمر کو اپنے کام سے مخلص نہیں پایا اور ڈرامے کے لیے ان کا انتخاب کرنے سے انکار کر دیا۔
اداکار نے بتایا کہ انہیں اپنی پروڈکشن کے لیے منجھے ہوئے فنکاروں کی تلاش تھی لیکن صبا قمر ان کے معیار پر پورا نہیں اتریں کیونکہ صبا قمر کو ڈائیلاگز بولنے میں مہارت حاصل نہیں تھی وہ بہت جلدی میں لائن پڑھ کر نکل پڑیں جس کا انہوں نے خود اعتراف بھی کرلیا کہ وہ جلدی میں تھیں۔
