جوڈیشل مجسٹریٹ شرقی کی عدالت نے دستاویز میں ردوبدل اور انسانی اسمگلنگ کے مقدمہ میں گرفتار نامور سماجی کارکن صارم برنی کی درخواست ضمانت مسترد کردی۔
دستاویزات میں ردو بدل اور انسانی اسمگلنگ کے مقدمہ میں ملزم صارم برنی کی درخواست ضمانت پر عدالت نے گزشتہ روز محفوظ کیا جانے والا فیصلہ سنادیا۔ اور عدالت نے صارم برنی کی درخواست ضمانت مسترد کردی۔
یہ بھی پڑھیں:امریکی شکایت پر صارم برنی کراچی ایئرپورٹ پر گرفتار
جوڈیشل مجسٹریٹ ایسٹ کی عدالت میں صارم برنی کے وکیل عامر نواز وڑائچ نے موقف اپنایا کہ ایف آئی اے نے تاحال حتمی چالان جمع نہیں کروایا ہے جبکہ متعلقہ بچوں کی کسٹڈی کی درخواست پر عدالت نے ٹرسٹ کو ہی کسٹڈی دی ہے، ٹرسٹ کو حکومتی تحویل میں لینے کا فیصلہ بھی واپس لے لیا گیا۔
مزید پڑھیں:کیا صارم برنی کی گرفتاری امریکا کے کہنے پر ہوئی؟
عامر وڑائچ ایڈووکیٹ نے صارم برنی کی ضمانت کی درخواست منظور کرنے پر زور دیتے ہوئے کہا کہ متعلقہ والدین بھی بچوں سے متعلق کوئی دستاویز پیش نہیں کرسکے ہیں، لہذا ان کے موکل کو بعد از گرفتاری ضمانت کا حقدار قرار دیا جائے۔
صارم برنی کی اس سے قبل بھی درخواست ضمانت مسترد ہوچکی ہے۔ ملزم صارم برنی اس وقت عدالتی ریمانڈ پر جیل میں ہیں۔
یہ بھی پڑھیں:گرفتاری سے قبل صارم برنی کا آخری پیغام کیا تھا؟
واضح رہے کہ صارم برنی کو رواں برس جون کے اوائل میں امریکا سے کراچی واپس آنے پر گرفتار کیا گیا تھا، ان کیخلاف تعزیرات پاکستان کی دفعات 420 ، 468، 471، اور 109 سمیت انسداد انسانی اسمگلنگ ایکٹ کے سیکشن 3، 4 اور 5 کے تحت مقدمات درج کیے گئے تھے۔
صارم برنی کیخلاف ان دفعات کے تحت دھوکہ دہی اور بے ایمانی سے جائیداد کی ترسیل پر آمادہ کرنا، دھوکہ دہی کے مقصد سے جعلسازی، جعلی دستاویز کو حقیقی طور پر استعمال کرنا، انسانی اسمگلنگ اور مجرمانہ سازش جیسے جرائم کے ارتکاب پر مقدمات درج کیے گئے ہیں۔
