پنجاب اسمبلی کے اجلاس میں حکومتی رکن احسن رضا خان نے صوبائی وزیر بلدیات کو جھوٹا قرار دے دیا۔
حکومتی رکن احسن رضا خان نے گرجدار آواز میں گفتگو کرتے ہوئے کہاکہ جناب اسپیکر! گاؤں کوٹ میلہ رام جاتا رہتا ہوں، کہا گیا کہ وہاں صاف پانی موجود ہے، یہ سب جھوٹ ہے، اور سیوریج کے نظام کی موجودگی کی بات بھی غلط ہے۔
یہ بھی پڑھیں پنجاب اسمبلی: 18 سال سے کم عمر افراد پر تیزاب کی خریدوفروخت پر پابندی کا بل جمع
انہوں نے کہاکہ وزیر بلدیات کہتے ہیں وہاں اسٹریٹ لائٹس ہیں، یہ بھی جھوٹ ہے، اس کے علاوہ تجاوزات کا خاتمہ کرنے کی بات میں بھی کوئی سچائی نہیں۔
احسن رضا نے کہاکہ عوامی مقامات کی صفائی نہ ہونے کے برابر ہے، اور غیر قانونی تجاوزات ہر جگہ موجود ہیں۔
ذیشان رفیق صاحب! احسن رضا کے سوال کا جواب دیں، اسپیکر
اس موقع پر اسپیکر نے صوبائی وزیر بلدیات کو مخاطب کرتے ہوئے کہاکہ ذیشان رفیق صاحب! احسن رضا نے جتنا جذباتی ہوکر بات کی ہے، اسی طرح اس کا جواب دیں۔
وزیر بلدیات ذیشان رفیق نے جواب دیتے ہوئے کہاکہ جناب اسپیکر! میں نے یہ نہیں کہاکہ کام ہوگیا ہے، میں کہہ رہا ہوں کام ہونے جارہا ہے۔
اس پر احسن رضا خان نے کہاکہ وزرا اگر ایسے جھوٹ بولتے رہیں گے تو پنجاب کے مستقبل کا تو اللہ ہی حافظ ہے، یہ وزیراعلیٰ کے ویژن کو سبوتاژ کررہے ہیں۔
انہوں نے کہاکہ بیوروکریٹس وزیراعلیٰ مریم نواز کے آگے پروجیکٹر لگاکر کہتے ہیں لاہور میں صاف پانی دستیاب ہے اور سب اچھا ہے تو یہ سب جھوٹ ہوتا ہے۔
اسپیکر کی عیسائیوں کے قبرستان کا مسئلہ حل کرنے کے لیے رولنگ
اسپیکر ملک احمد خان نے کہاکہ یہ جو ہمارے اراکین کے جذبات ہیں یہ بتا رہے ہیں کہ دیہات میں کتنا کام ہونے کی ضرورت ہے۔
اس پر وزیر بلدیات نے کہاکہ حکومت کو بار ہا کہا کہ عیسائیوں کے قبرستان کا سب سے بڑا مسئلہ ہے۔
اس پر اسپیکر ملک احمد خان بولے کہ عیسائیوں کو اپنے مردے دفنانے کی جگہ نہیں مل رہی، اس لیے ہنگامی بنیادوں پر عیسائیوں کے لیے کام کریں۔
یہ بھی پڑھیں پنجاب اسمبلی کے 50 سے زیادہ اراکین نے سیکریٹری صحت کے خلاف تحریک استحقاق جمع کرا دی
اسپیکر نے رولنگ دی کہ عیسائیوں کے لیے شہر سے باہر قبرستان ضرور بنائیں، جسپال سنگھ اور میڈم عائشہ کو پنجاب اسمبلی کی مہمان گیلری میں خوش آمدید کہتے ہیں۔
