کراچی کے علاقے پرانا گولیمار میں 8 سالہ بچہ کے نالے میں ڈوبنےکی اطلاع پر گزشتہ شام ریسکیو 1122 نے آپریشن شروع کیا جسے ہانی کے بہاؤ، نالے میں کچرے اور اندھیرے کے باعث دو بار روکنا پڑا، آج صبح بچے کی لاش نالے سے نکال لی گئی ہے۔
عینی شاہدین کے بیانات کی روشنی میں پولیس کا موقف ہے کہ 8 سالہ حیدر علی کو ایک خاتون نے نالے میں پھینکا تھا، جن کا دماغی توازن درست نہیں، عینی شاہدین کے مطابق بچہ نالے کے نزدیک کھیل رہا تھا کہ ایک خاتون نے اسے نالے میں پھینک کر فرار ہوگئی۔
یہ بھی پڑھیں:کراچی، اندھی گولی سے بچی کی ہلاکت کا واقعہ، مبینہ ملزم جسمانی ریمانڈ کے لیے پولیس کے حوالے
ہلاک ہونیوالے بچے کے والد وسیم کا کہنا ہے کہ ان کا خاندان صدمہ سے دوچار ہے اور اس وقت کسی کے خلاف ایف آئی آر درج کرانے کا نہیں سوچا، کیونکہ عینی شاہدین کے مطابق جس خاتون نے دھکا دیا تھا اس کی ذہنی حالت درست نہیں ہے۔
پولیس کے مطابق حیدرعلی کے نالے میں ڈوبنے سے متعلق اس کے والد وسیم نے ہی پولیس ہیلپ لائن مددگار 15 پر کال کرکے آگاہ کیا تھا، اس واقعہ کی مزید تحقیقات جاری ہیں۔
