صوبائی دارالحکومت کراچی سمیت سندھ کے مختلف شہروں میں 13 سے 17 ستمبر تک موٹرسائیکل کی ڈبل سواری پر پابندی عائد کر دی گئی ہے۔
سندھ کے مختلف شہروں میں جمعہ 13 ستمبر سے 5 روز کے لیے موٹر سائیکل کی ڈبل سواری پر پابندی عائد کردی گئی۔
یہ پابندی جشن عید میلادالنبی صلی اللہ علیہ وسلم کے موقعے پر لگائی جارہی ہے جس کے دوران کراچی، حیدرآباد، سکھر اور لاڑکانہ میں موٹر سائیکل کی ڈبل سواری 13 تا 17 ستمبر بند رہے گی۔
پابندی آئی جی سندھ غلام نبی میمن کی درخواست پر محکمہ داخلہ سندھ کی جانب سے عائد کی گئی ہے اور اس حوالے سے نوٹیفکیشن بھی جاری کردیا گیا ہے۔
گورنر سندھ کا وفاق و دیگر کو خط
سندھ کے گورنر کامران خان ٹیسوری نے وزیراعظم شہباز شریف، وزیراعلیٰ سندھ مراد علی شاہ اور چیئرمین پیمرا کو 11 ربیع الاول کو عام تعطیل کے لیے خط لکھا ہے۔
خط میں انہوں نے کہا کہ ربیع الاول امت مسلمہ کے لیے انتہائی مقدس مہینہ ہے، 11 ربیع الاول کے روز عام تعطیل کی جائے، اس طرح لوگوں کو جشن عید میلاد النبی صلی اللہ علیہ والہ وسلم مذہبی جوش و خروش سے منانے کا موقع ملے گا۔
گورنرسندھ چینلز اور کیبلز آپریٹرز کو ربیع الاول کے احترام میں نشریات کے دوران چیک اینڈ بیلنس رکھنے کی بھی ہدایت کی ہے۔
یاد رہے کہ سندھ حکومت نے 26 اگست کو شہدائے کربلا کے موقعے پر بھی ڈبل سواری پر پابندی عائد کی تھی۔ وہ پابندی کراچی، حیدرآباد، میرپورخاص، نوابشاہ، سکھر اورلاڑکانہ سمیت صوبے کے مختلف حصوں میں لگائی گئی تھی۔ اس دوران ڈرون کیمرے اڑانے پر بھی پابندی تھی۔
واضح رہے کہ 12 ربیع الاوّل 17 ستمبر بروز منگل کو ہوگی۔
