وفاقی وزیر اطلاعات و نشریات عطااللہ نے تارڑ نے کہا ہے کہ اسپیکر قومی اسمبلی ایاز صادق نے پارلیمان کی بالادستی کے لیے چیف الیکشن کمشنر کو خط لکھا ہے۔
اسلام آباد میں پریس کانفرنس کرتے ہوئے انہوں نے کہاکہ اسپیکر قومی اسمبلی کا الیکشن کمیشن کو خط سنگ میل ہے، کیونکہ آئین میں پارلیمنٹ کو قانون سازی کا اختیار دیا گیا ہے۔
یہ بھی پڑھیں وسیع تر سیاسی مشاورت کی وجہ سے آئینی ترمیم کے لیے آگے بڑھنے میں تاخیر ہو رہی ہے، وزیر اطلاعات
عطااللہ تارڑ نے کہاکہ پارلیمنٹ بالادست ادارہ ہے، یہ اختیار کسی دوسرے ادارے کے پاس نہیں، سپریم کورٹ کی آرٹیکل 63 اے کی تشریح آئین کو دوبارہ لکھنے کے مترادف ہے۔
انہوں نے کہاکہ کسی پارٹی میں شامل ہونے والا رکن دوبارہ کسی اور جماعت میں کیسے شامل ہوسکتا ہے؟ مخصوص نشستوں سے متعلق عدالتی فیصلے نے بہت سے سوالوں کو جنم دیا ہے۔
وزیر اطلاعات نے کہاکہ اسپیکر نے آج جو قدم اٹھایا اس پر ہم انہیں خراج تحسین پیش کرتے ہیں، کسی ادارے کو حق حاصل نہیں کہ وہ آئین کی اپنی مرضی سے تشریح کرے اور پارلیمان کو کمزور کرنے کی کوشش کرے۔
انہوں نے کہاکہ قانون سازی عوام کے منتخب نمائندوں کا حق ہے، پارلیمان کی بالادستی کے لیے ہم اپنا کردار ادا کرتے رہیں گے۔
وزیر اطلاعات نے کہاکہ اسپیکر ایاز صادق نے ہمیشہ اپنی کرسی کے ساتھ انصاف کیا، پارلیمان میں موجود تمام جماعتوں کے ساتھ ان کا رویہ ہمیشہ اچھا رہا۔
عطااللہ تارڑ نے کہاکہ اسپیکر ایاز صادق کی ہمیشہ کوشش ہوتی ہے کہ کسی رکن کی حق تلفی نہ ہو، سیاسی جماعتوں نے ہمیشہ ان کے فیصلوں کی تائید کی ہے۔
یہ بھی پڑھیں ملکی معیشت پہلے ہی زوال پذیر، ایک غلط خبر ناقابل تلافی نقصان پہنچا سکتی ہے، وزیر اطلاعات
واضح رہے کہ اسپیکر قومی اسمبلی سردار ایاز صادق نے الیکشن کمیشن آف پاکستان کو خط لکھ کر مطالبہ کیا ہے کہ پارلیمنٹ کی خود مختاری قائم رکھنے کے لیے مخصوص نشستوں کا معاملہ حل کیا جائے، آزاد اراکین جو ایک سیاسی جماعت کا حصہ بن گئے انہیں پارٹی تبدیل کرنے کی اجازت نہیں۔
