بلوچستان کی ننھی بیڈمنٹن کھلاڑی ثروت فاطمہ نے صرف 11 سال کی عمر میں ہی قومی اور بین الاقوامی سطح پر اپنی صلاحیتوں کا لوہا منوا کر پاکستان کا نام روشن کیا ہے۔ ثروت نے حال ہی میں جنوبی ایشیا جونیئر بیڈمنٹن چیمپئین شپ 2024 میں چاندی اور تانبے کے تمغے جیت کر نہ صرف بلوچستان بلکہ پورے پاکستان کے شہریوں کا سرفخر سے بلند کیا ہے۔
ثروت کی کامیابیوں کا سلسلہ صرف یہیں تک محدود نہیں ہے، وہ 2023 میں نیشنل بینک آل پاکستان انڈر-17 بیڈمنٹن چیمپئین شپ کی رنراپ اور قومی گیمز 2023 کوئٹہ میں پاکستان آرمی ٹیم کی رنر اپ رہی ہیں۔ اس کے علاوہ، ثروت 2022 میں آل پاکستان فینکس بیڈمنٹن ٹورنامنٹ چارسدہ میں انڈر-13 کی فاتح اور انڈر 16 نیشنل بیڈمنٹن چیمپئین شپ پشاور کی فاتح بھی رہی ہیں۔
ساتویں کلاس میں پڑھنے والی ثروت کی بیڈمنٹن کے لیے محبت حد سے بڑھ کر ہے۔ ان کا خواب ہے کہ وہ مستقبل میں بیڈمنٹن کی دنیا میں اپنا ایک منفرد مقام حاصل کریں۔ ثروت کے کامیاب سفر کے پیچھے ان کی محنت، لگن اور والدین کا تعاون ہے۔ ثروت کے والدین نے انہیں بیڈمنٹن کھیلنے کے لیے ہر ممکن سہولت فراہم کی ہے۔ ثروت کے والد محمد علی ہی ان کے کوچ، ٹرینر اور اسپانسر ہیں۔
ثروت کی کامیابی پاکستان کے نوجوان کھلاڑیوں کے لیے ایک مثال ہے۔ وہ ثابت کرچکی ہیں کہ محنت، لگن اور اعتماد کے ساتھ کوئی بھی خواب پورا کیا جاسکتا ہے۔ ثروت کا مستقبل روشن ہے اور امید ہے کہ وہ پاکستان کے لیے مزید اعزازات حاصل کریں گی۔
