شمالی اور جنوبی وزیرستان کے اضلاع میں پاک فوجی اور خوارجی دہشت گردوں کے درمیان شدید نوعیت کے 2 مختلف مقابلوں میں 12 خوارج مارے گئے ہیں۔
آئی ایس پی آر کے مطابق سیکیورٹی فورسز نے 19 ستمبر کو شمالی وزیرستان کے علاقے اسپن وام میں 7 دہشت گردوں کے ایک گروپ کی نقل و حرکت کا سراغ لگایا، مذکورہ گروپ پاک افغان سرحد پر دراندازی کی کوشش کر رہا تھا۔
یہ بھی پڑھیں:شمالی وزیرستان: فائرنگ کے تبادلے میں رزمک میں 2 دہشت گرد ہلاک، آئی ایس پی آر
دراندازی کی کوشش میں مصروف خارجی دہشت گردوں کو گھیر کر مؤثر طریقے سے مصروف کیا گیا اور شدید فائرنگ کے تبادلے کے بعد ساتوں خوارج کو ہلاک کردیا گیا، دہشت گردوں کے قبضہ سے بھاری مقدار میں اسلحہ، گولہ بارود اور دھماکہ خیز مواد بھی برآمد کیا گیا ہے۔
ایک دوسرے واقعہ میں جنوبی وزیرستان کے ضلع لدھا میں خوارج کے ایک گروپ نے سیکیورٹی فورسز کی چوکی پر حملہ کیا، پاک فوج کے جوانوں نے دلیری سے مقابلہ کرتے ہوئے دراندازی کی کوشش کو ناکام بنا دیا اور 5 خوارج کو ہلاک کر دیا، تاہم شدید فائرنگ کے تبادلے میں دھرتی کے 6 بہادر بیٹوں نے بہادری سے لڑتے ہوئے جام شہادت نوش کیا۔
مزید پڑھیں:شمالی وزیرستان میں سیکیورٹی فورسز کی کارروائی میں انتہائی مطلوب دہشتگرد ہلاک
آئی ایس پی آر کے مطابق علاقے میں موجود کسی بھی دوسرے خارجیوں کی ممکنہ موجودگی کے خدشہ کے پیش نظر کارروائی کی جارہی ہے، پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں اور بہادر سپاہیوں کی اس نوعیت کی قربانیاں ہمارے عزم کو مزید مضبوط کرتی ہیں۔
