پاکستان تحریک انصاف (پی ٹی آئی) کے بانی عمران خان نے میانوالی کا جلسہ منسوخ کرنے کا اعلان کرتے ہوئے کہا ہے کہ ہم 28 ستمبر کو راولپنڈی میں جلسہ کریں گے۔
اڈیالہ جیل میں صحافیوں سے گفتگو کرتے ہوئے انہوں نے کہاکہ اگر جلسے کی اجازت نہ ملی تو ہم احتجاج کریں گے، میں نے پارٹی کو عدالت سے رجوع کرنے کا کہا ہے۔
یہ بھی پڑھیں عمران خان نے پریکٹس اینڈ پروسیجر کمیٹی میں چیف جسٹس کیخلاف دوبارہ درخواست دے دی
انہوں نے کہاکہ اسرائیلی اخبار میں چھپنے والے مضمون کے حوالے سے پروپیگنڈا کیا گیا، حالانکہ اس میں میری ساکھ کی بات کرتے ہوئے تعریف کی گئی۔ اخبار نے لکھا ہے میں پاکستان کا واحد لیڈر ہوں جس کی مسلمان ممالک اور مغربی ممالک میں ساکھ ہے۔
عمران خان نے کہاکہ اسرائیل کے حوالے سے میرا موقف آج بھی واضح ہے، آپ پہلے دو ریاستی حل کی طرف جائیں پھر آپ سے بات ہوگی، اسرائیل فلسطینیوں کی نسل کشی کررہا ہے، ان سے تعلقات کا حامی کیسے ہوسکتا ہوں۔
انہوں نے کہاکہ شہباز شریف کا ایک بیان آیا ہے کہ اچھے بچے بنو، مل کر رہو تاکہ ملک ترقی کرے، تو ان کے لیے پیغام ہے کہ امن انصاف سے آتا ہے۔
بانی پی ٹی آئی نے کہاکہ ملک میں ہونے والے عام انتخابات میں ڈاکا مارا گیا، 9 مئی واقعات میں کارکنوں کو جیل میں ڈالا گیا اور کوئی تحقیقات نہیں ہو رہیں۔
عمران خان نے سوال کیا کہ کیا آپ جو ترامیم کرنے جارہے ہیں ان سے امن آئے گا، چیف جسٹس اور چیف الیکشن کمشنر امپائر کے ساتھ اوپنر بلے باز بھی ہیں۔ جبکہ تھرڈ امپائر ان کی ٹیم کا کپتان ہے، وہ پیچھے بیٹھ کر سب چلا رہا ہے، اسی لیے یہ لوگ اپنے امپائرز کو توسیع دے رہے ہیں۔
انہوں نے کہاکہ ان لوگوں کو اس لیے تحفظ دیا جارہا ہے تاکہ الیکشن فراڈ نہ کھلے اور 9 مئی واقعات کی سی سی ٹی وی فوٹیج سامنے نہ آئے۔
عمران خان نے کہاکہ یحییٰ خان نے بھی وہی کیا تھا جو آج یہ کررہے ہیں، یہ ٹولہ الیکشن فراڈ چھپانے کے لیے معاشرے اور جمہوریت کی تباہی کررہا ہے۔
انہوں نے کہاکہ آمدن نہ بڑھنے سے قرض بڑھ رہا ہے، کوئی سرمایہ کاری کو تیار نہیں اور لوگ ملک چھوڑ کر جا رہے ہیں۔
عمران خان نے کہاکہ لاہور میں جلسے سے ایک دن قبل اجازت دی گئی اور پھر کنٹینرز لگا دیے گئے، ہمارے جلسوں میں لوگ پیدل چل کر آتے ہیں، ہم قیمے والے نان نہیں کھلاتے۔
یہ بھی پڑھیں عمران خان اور بشریٰ بی بی کی ضمانت کی درخواست غیرموثر قرار
انہوں نے کہاکہ عدلیہ کو ختم کرکے یہ لوگ غیر اعلانیہ مارشل لا لگانا چاہتے ہیں، یہ وہ ترامیم کرنے لگے ہیں جو کسی آمر نے بھی نہیں کیں، ہم ان ترامیم کے خلاف اسٹریٹ موومنٹ شروع کریں گے۔
