پاکستان اور آذربائیجان کے درمیان عسکری معاہدہ طے پا گیا ہے جس کے تحت پاکستان آذربائیجان کو فضائی قوت میں اضافے کے لیے جے ایف-17 بلاک تھری لڑاکا طیارے فروخت کرے گا۔
پاک فوج شعبہ تعلقات عامہ (آئی ایس پی آر) کے جاری بیان کے مطابق، دوست ممالک کے ساتھ دفاعی تعاون کو فروغ دینے کے لیے پاکستان نے آذربائیجان کی فضائی طاقت کو بڑھانے کے لیے جے ایف-17 بلاک تھری لڑاکا طیاروں کی فروخت کے معاہدے پر حال ہی میں دستخط کیے تھے۔
یہ بھی پڑھیں: پاک فضائیہ کے تھنڈر طیاروں کی بین الاقوامی فضائی مشق ’برائٹ اسٹار‘ میں شرکت
آذربائیجان کے صدر الہام علیوف کو حالیہ دورہ پاکستان کے دوران جے ایف-17 بلاک تھری لڑاکا طیاروں کی جنگی صلاحیتوں اور دیگر مقاصد کے لیے اس کے استعمال سے متعلق بریفنگ دی گئی۔ صدر الہام علیوف کے دورے کے بعد حکومت آذربائیجان کی درخواست پر پاکستان نے پاک فضائیہ کا ایک دستہ باکو میں ADEX-2024 میں شرکت کے لیے بھیجا جس میں پاک فضائیہ نے اپنی صلاحیتوں کا مظاہرہ کیا اور جے ایف-17 تھنڈر بلاک-تھری کی نمائش بھی کی۔
باکو میں تعیناتی کا حکم ملنے کے بعد جے ایف-17 نے پی اے ایف ملٹی رول ٹینکر ٹرانسپورٹ (ایم آر ٹی ٹی) طیارے سے آذربائیجان کے لیے ایئر ٹو ایئر فیولنگ بھی انجام دے کر طویل فاصلے تک پہنچنے کی صلاحیت کا مظاہرہ بھی کیا۔ صدر الہام علیوف نے جے ایف-17 تھنڈر بلاک تھری کی نمائش کا دورہ کرنے کے بعد جے ایف-17 تھنڈر کی جانب سے فضائی مظاہرے کا مشاہدہ بھی کیا جس میں پاک فضائیہ کے پائلٹس نے بہترین پیشہ ورانہ صلاحیتیں دکھاتے ہوئے طیارے کی تیزرفتاری اور دشمن سے نمٹنے کی صلاحیت کا شاندار مظاہرہ کیا۔
یہ بھی پڑھیں: کثیر الملکی فضائی مشقوں میں شرکت کے بعد پاک فضائیہ کا دستہ واپس وطن پہنچ گیا
جے ایف-17 تھنڈر بلاک تھری ایک AESA ریڈار اور لانگ رینج BVR سے لیس 4.5 جنریشن کا ملٹی رول لڑاکا طیارہ ہے جو عصری فضائی طاقت فراہم کرتے ہوئے جنگی مشن سرانجام دینے کی صلاحیت رکھتا ہے اور آذربائیجان کے بیڑے میں اس کی شمولیت سے اس کی قومی سلامتی کو مزید مضبوط بنانے میں مدد ملے گی۔ آذربائیجان کے صدر نے کہا کہ پاکستان کی جانب سے فراہم کردہ حمایت دونوں ملکوں کے درمیان موجودہ عسکری تعاون کو مضبوط، دفاعی تعاون کے فروغ اور دونوں ممالک کے درمیان برادرانہ تعلقات کو مضبوط بنانے میں اہم کردار ادا کرے گی۔
