بلوچستان کے ضلع پنجگور میں بلوچستان لبریشن آرمی ( بی ایل اے) کے دہشتگردوں نے فائرنگ کر کے پنجاب سے تعلق رکھنے والے 7 مزدوروں کو قتل کر دیا ہے، وزیر اعظم شہباز شریف نے واقعے کی شدید الفاظ میں مذمت کرتے ہوئے کہا ہے کہ سفاکانہ قتل میں ملوث دہشتگرد کسی رعایت کے مستحق نہیں ہیں۔
پنجگور پولیس کا کہنا ہے کہ ہفتے کے روز بلوچستان کے ضلع پنجگور میں بلوچستان لبریشن آرمی کے دہشگردوں نے فائرنگ کر کے 7 افراد کو قتل کر دیا ہے، یہ واقعہ پنجگور کے علاقے خداآبادان میں پیش آیا جہاں ایک مکان میں مزدور رہائش پذیر تھے۔
پولیس کے مطابق رات کے تقریباً ساڑھے 9 بجے دہشگردوں نے مکان میں گھس کر اندھا دھند فائرنگ کر دی جس کے نتیجے میں 6 افراد موقع پر ہی جاں بحق ہو گئے جبکہ 2 افراد شدید زخمی ہوئے جنہیں پنجگور سول اسپتال منتقل کیا گیا لیکن وہاں وہ زخموں کی تاب نہ لاتے ہوئے چل بسے۔
پولیس کے مطابق قتل ہونے والے تمام مزدوروں کا تعلق صوبہ پنجاب کے ملتان ڈویژن کے شجاع آباد علاقے سے ہے، جن کی شناخت ساجد، فیاض، خالد، شفیق، افتخار احمد، سلمان، اللہ وسایا اورمحمد رمضان کے نام سے ہوئی ہے جبکہ زخمی ایک شخص کی شناخت بلال کے نام سے ہوئی ہے۔
ڈسٹرکٹ پولیس آفیسر(ڈی پی او) پنجگور فاضل بخاری نے وی نیوز سے بات کرتے ہوئے بتایا کہ قتل ہونے والے مزدور پنجگور میں تعمیراتی کام سے منسلک تھے۔ تاہم واقع کی تحقیقات کا سلسلہ شروع کردیا ہے۔
دوسری جانب وزیر اعلٰی بلوچستان میر سرفراز بگٹی نے پنجگور میں مزدوروں کے بہمانہ قتل کی مذمت کرتے ہوئے کہا کہ بے گناہ مزدوروں کا قتل قابل مذمت ہے۔ آج پھر بلوچستان کی دھرتی پر بے گناہ لوگوں کا لہو گرایا گیا ہے۔
انہوں نے کہا کہ دہشتگرد بزدل اور انسانیت سے بے بہرہ ہیں۔ دہشتگرد بے گناہوں کے قتل کا حساب دنیا و آخرت دونوں میں دیں گے۔ بلوچستان میں ایک بار پھر دہشتگردوں نے غریب پاکستانی مزدوروں پر وار کیا ہے۔
وزیر اعلیٰ نے کہا کہ دہشتگرد کب تک بلوں میں چھپیں گے ، ان سے بے گناہ پاکستانیوں کے قتل کا چن چن کر حساب لیا جائے گا۔
ادھر وزیر داخلہ محسن نقوی نے بلوچستان میں ملتان کے علاقے شجاع آباد سے تعلق رکھنے والے 7 مزدوروں کے بہیمانہ قتل کی شدید الفاظ میں مذمت کرتے ہوئے کہا ہے کہ دہشتگرد کسی رعایت کےمستحق نہیں ہیں۔
