خادم الحرمین الشریفین شاہ سلمان بن عبدالعزیز آل سعود کی سرپرستی میں کل بروز بدھ چوتھا بین الاقوامی سائبر سیکیورٹی فورم منعقد ہو رہا ہے جس کا اہتمام نیشنل سائبر سیکیورٹی اتھارٹی نے (سائبر اسپیس میں مشترکہ عمل کو فروغ دینا) کے موضوع کے تحت کیا ہے۔
اس فورم کا مقصد عالمی تعاون کو فروغ دینا اور سائبر اسپیس میں درپیش فوری مسائل سے نمٹنا ہے۔
یہ بھی پڑھیں: ریاض انٹرنیشنل بک فیئر 2024 کو کیوں غیر معمولی عوامی پذیرائی حاصل ہورہی ہے؟
فورم 2 اکتوبر سے شروع ہوگا اور 2 دن تک جاری رہے گا۔ اس میں دنیا بھر کے نمایاں فکری رہنما، سی ای اوز، فیصلہ ساز اور سائبر سیکیورٹی کے ماہرین شرکت کریں گے۔ فورم میں 120 سے زائد ممالک کی بڑی بین الاقوامی کمپنیاں بھی شامل ہوں گی۔
فورم کی ایک خاص بات (سائبر اسپیس میں بچوں کے تحفظ کے لیے پہلی عالمی کانفرنس) ہے جو نیشنل سائبر سیکیورٹی اتھارٹی، انٹرنیشنل سائبر سیکیورٹی فورم ،ITU اور UNICEF کے تعاون سے منعقد کی جا رہی ہے۔ اس کا مقصد بچوں کے خلاف بڑھتے ہوئے سائبر خطرات کے بارے میں عالمی سطح پر آگاہی فراہم کرنا ہے۔
فورم میں مختلف موضوعات پر مکالمے ہوں گے جن میں بین الاقوامی تعاون، سائبر رویہ، سائبر معیشت اور ابھرتی ہوئی ٹیکنالوجیز کے فروغ پر بات چیت کی جائے گی۔