پاکستان تحریک انصاف کے مرکزی صدر چودھری پرویزالٰہی نے کہا ہے کہ موجودہ سیاسی عدم استحکام تحریک انصاف کے انتخابی مینڈیٹ کو تسلیم نہ کرنے کا نتیجہ ہے۔
پاکستان تحریک انصاف کے مرکزی صدر چودھری پرویزالٰہی نے احتساب عدالت میں پیشی پر میڈیا سے گفتگو کرتے ہوئے کہا ہے کہ موجودہ سیاسی عدم استحکام تحریک انصاف کے انتخابی مینڈیٹ کو تسلیم نہ کرنے کا نتیجہ ہے۔ ہر سچے پاکستانی کی طرح، میں اور میری فیملی مضبوطی سے عمران خان کے ساتھ کھڑے ہیں۔
یہ بھی پڑھیے: حکومت نے پرویز الٰہی کا نام پاسپورٹ کنٹرول لسٹ سے نکال دیا
انہوں نے کہا کہ عمران خان عوام کے دلوں میں بستے ہیں، عوام خود ہی اپنے ہیرو کیلئے باہر نکلتی ہے۔ پاکستان میں سیاست کی کنجی آج بھی عمران خان کے ہاتھ میں ہے۔ عمران خان اور تحریک انصاف کے رہنماؤں، کارکنوں پر جتنے مرضی جھوٹے پرچے کروا لیں لیکن اب ظلم کے بادل چھٹنے والے ہیں۔ عدلیہ پر پورا یقین ہے، انشا اللہ جلد ہی عمران خان دوبارہ عوام کے درمیان ہوں گے۔
چوہدری پرویز الٰہی نے کہا ہے کہ عمران خان کی دشمنی میں صحت کارڈ سکیم ختم کر کے پنجاب حکومت روزانہ ہزاروں غریب مریضوں کو موت کے منہ میں دھکیل رہی ہے۔ پنجاب کے کاشت کار آج رُل گئے ہیں، کوئی ان کا والی وارث نہیں۔آج دوسروں کے لیے اناج اگانے والوں کے اپنے گھروں کے چولہے بجھ رہے ہیں۔
یہ بھی پڑھیے: چوہدری شجاعت اور پرویز الٰہی میں صلح کی خبریں، اصل معاملہ کیا ہے؟
پی ٹی آئی کے مرکزی صدر نے کہا کہ عمران خان اب صرف پاکستان کے لیڈر نہیں بلکہ دنیائے اسلام کے لیڈر بن چکے ہیں۔ اقوام متحدہ میں اصل خطاب تو عمران خان کا تھا، دنیا ان کی آواز سنتی ہے۔ عمران خان نے پہلے ہی بتا دیا تھا کہ اس طرح کا سلوک رکھا گیا تو ہمارے پاس اور کوئی چوائس نہیں۔ ساری پاکستانی قوم اور مسلم امہ ایک طرف کھڑے ہو جائیں گے۔
