وفاقی وزیرداخلہ محسن نقوی نے چین کے سفارتخانے میں جاکر کراچی دھماکے میں 2 چینی شہریوں کی ہلاکت پر دکھ اور افسوس کا اظہار کیا ہے۔
وزیرداخلہ محسن نقوی نے چینی سفیر سے ملاقات کی اور کراچی دھماکے میں 2 چینی شہریوں کے ہلاک ہونے کے واقعہ پر گہرے دکھ اور افسوس کا اظہار کیا۔
یہ بھی پڑھیں کراچی: جناح ایئرپورٹ کے قریب دھماکا، 3 غیرملکیوں سمیت 4 افراد ہلاک، 17 زخمی
وزیرداخلہ محسن نقوی نے چین کے سفیر، حکومت اور ہلاک چینی شہریوں کے خاندانوں کے ساتھ مکمل یکجہتی کااظہار کیا۔
وفاقی وزیرداخلہ محسن نقوی نے چینی سفیر کو دھماکے کی تمام تفصیلات اور تحقیقات میں پیشرفت کے حوالے سے آگاہ کیا۔
وزیر داخلہ محسن نقوی نے کہاکہ دکھ کی گھڑی میں چین کی حکومت اور ہلاک شہریوں کے خاندانوں کے ساتھ ہیں۔
انہوں نے کہاکہ پوری پاکستانی قوم اپنے چینی بھائیوں کے غم میں برابر کی شریک ہے، واقعہ کی جامع تحقیقات کو یقینی بناکر اس اندوہناک سانحہ میں ملوث عناصر کو قرار واقعی سزا دی جائے گی۔
محسن نقوی نے کہاکہ پاکستان چین دوستی پر حملہ ناقابل برداشت ہے اور برادرانہ تعلقات کو نقصان پہنچانے کی گھناؤنی سازش ہے، بزدل دشمن کی اس سازش کو ہرگز کامیاب نہ ہونے دیں گے۔
انہوں نے کہاکہ پاکستان کی ترقی کے لیے کام کرنے والے چینی بھائیوں کی حفاظت اولین ترجیح ہے، چینی شہریوں پر حملے کی جتنی بھی مذمت کی جائے کم ہے۔
یہ بھی پڑھیں کراچی ایئرپورٹ کے قریب دھماکا، تحقیقاتی اداروں کی تفتیش میں کیا سامنے آیا؟
وزیر داخلہ نے کہاکہ دشمن نے پاکستان کے انتہائی قابل اعتماد دوست ملک کے شہریوں کو نشانہ بنایا، یہ حملہ چینی شہریوں پر نہیں بلکہ پاکستان پر ہے، دشمن کو اس حملے کا سخت جواب دیا جائے گا۔
