وفاقی وزیر اطلاعات و نشریات عطااللہ تارڑ نے کہا ہے کہ شنگھائی تعاون تنظیم (ایس سی او) کا سربراہی اجلاس پاکستان میں منعقد ہونا ہمارے لیے باعث اعزاز ہے۔
اسلام آباد میں چائنا میڈیا گروپ کے زیراہتمام منعقدہ میڈیا ورکشاپ سے خطاب کرتے ہوئے عطااللہ تارڑ نے کہاکہ معیشت کے حوالے سے اچھی خبریں آرہی ہیں اور اس کے ثمرات اب عوام تک پہنچنا شروع ہوگئے ہیں۔
یہ بھی پڑھیں اگلے 8 سے 10 ماہ میں بجلی کی قیمت 10 روپے یونٹ تک لائیں گے، وزیر توانائی نے خوشخبری سنادی
وزیر اطلاعات نے کہاکہ انسداد دہشتگردی کی کوششوں میں پاکستان کے 80 ہزار شہری شہید ہوگئے، اس حوالے سے علاقائی تعاون سے خطے میں امن کو فروغ ملے گا۔
عطااللہ تارڑ نے کہاکہ پاکستان کو موسمیاتی تبدیلیوں کی وجہ سے بھاری نقصان ہورہا ہے حالانکہ زہریلی گیسوں کے اخراج میں ہمارا ایک فیصد بھی حصہ نہیں، اس لیے علاقائی تعاون موسمیاتی تبدیلی سے نمٹنے کے لیے اہم ہے۔
وزیر اطلاعات نے کہاکہ ہم نے ایس سی او کے پلیٹ فارم سے ہمیشہ عالمی امن کی بات کی ہے، آستانہ میں بھی فلسطین کے مسئلے کو اجاگر کیا گیا، اب بھی ضروری ہے کہ شنگھائی تعاون تنظیم اجلاس میں فلسطین کے معاملے پر بات کی جائے۔
انہوں نے کہاکہ دنیا میں امن اس وقت قائم ہوگا جب مشرق وسطیٰ میں طویل المدتی امن قائم ہو، دنیا کو ماننا ہوگا کہ نہتے فلسطینیوں کی نسل کشی کی جارہی ہے۔
یہ بھی پڑھیں حالات بدل رہے ہیں، پاکستان جلد دنیا کی 24ویں معیشت بن کر ابھرے گا، نائب وزیر اعظم
وزیر اطلاعات نے کہاکہ پاکستان کی 68 فیصد آبادی نوجوانوں پر مشتمل ہے، ایف بی آر میں اصلاحات کی وجہ سے ٹیکس فائلرز کی تعداد میں اضافہ ہوا ہے۔
