ریاض میں وزیر اطلاعات نے (واس نیوز ٹریننگ اکیڈمی) کا باقاعدہ افتتاح کر دیا، جو میڈیا کے شعبے میں مہارت اور پیشہ ورانہ تربیت فراہم کرنے کے لیے قائم کی گئی ہے۔ یہ غیر منافع بخش ادارہ سعودی میڈیا کو عالمی معیار کے مطابق ترقی دینے کے مشن کے تحت کام کرے گا۔
افتتاحی تقریب کے دوران اکیڈمی کی تعارفی ویڈیو پیش کی گئی اور اکیڈمی کو باضابطہ طور پر لائسنس فراہم کیا گیا۔ اس موقع پر 9 مفاہمتی یادداشتوں پر بھی دستخط ہوئے، جن کے تحت اکیڈمی مختلف مقامی اور بین الاقوامی اداروں کے تعاون سے تربیتی پروگرام منعقد کرے گی۔
واس نیوز ٹریننگ اکیڈمی کا قیام میڈیا کے پیشہ ور افراد کو جدید عملی تربیت فراہم کرنے کے لیے عمل میں لایا گیا ہے۔ اس اقدام کا مقصد سرکاری اور نجی شعبے کے افراد کی صلاحیتوں میں نکھار لانا اور میڈیا کے میدان میں سعودی عرب کی موجودگی کو مزید مضبوط بنانا ہے۔
یہ بھی پڑھیں:سعودی عرب کا اقوام متحدہ میں فلسطینی عوام کے حقوق اور جنگ بندی پر زور
تقریب میں فنی اور پیشہ ورانہ تربیت کے ادارے، نیشنل ای لرننگ سینٹر، سعودی ایکریڈیٹیشن سینٹر، ہیومن ریسورس ڈویلپمنٹ فنڈ (ہدف) اور مائیکروسافٹ سمیت دیگر اہم شراکت داروں نے شرکت کی۔
اکیڈمی کے ذریعے سعودی میڈیا کی نئی نسل کو عالمی سطح پر کامیاب بنانے کے لیے تربیت دی جائے گی، جس سے نہ صرف قومی بلکہ بین الاقوامی سطح پر بھی سعودی صحافت کا وقار بلند ہوگا۔
