خیبر پختونخوا کے علاقوں شمالی وزیرستان اور جنوبی وزیرستان میں سیکیورٹی فورسز کا دہشت گردوں کے ساتھ فائرنگ کا تبادلہ ہوا ہے جس کے نتیجے میں 2 دہشت گرد ہلاک اور ایک جوان شہید ہوگیا ہے۔
انٹر سروسز پبلک ریلیشنز (آئی ایس پی آر )کے مطابق شمالی وزیرستان کے علاقے رزمک میں سیکیورٹی فورسز کا دہشت گردوں کے ساتھ فائرنگ کا تبادلہ ہوا اور اس دوران فورسز نے کارروائی کر کے ایک دہشت گرد کو ہلاک کردیا ہے ۔
ہلاک دہشت گرد سے اسلحہ اور گولہ بارود برآمد ہوا ہے جبکہ علاقے میں کلیئرنس آپریشن جاری ہے۔
آئی ایس پی آر نے بتایا کہ جنوبی وزیرستان کے علاقے کرامہ میں بھی سیکیورٹی فورسز کا دہشت گردوں کے ساتھ فائرنگ کا تبادلہ ہوا ہے جس کے نتیجے میں ایک دہشت گرد ہلاک ہو گیا جبکہ ایک جوان بھی شہید ہوگیا ہے۔
دہشت گردوں کے ساتھ فائرنگ کے تبادلے میں شہید ہونے والے جوان کی شناخت نائیک فضل کے نام سے ہوئی ہے جو ہنگو کا رہائشی تھا اور اس کی عمر 32 سال تھی۔
ڈی جی آئی ایس پی آر کے مطابق علاقے سے دہشت گردوں کے خاتمے کے لیے کلیئرنس آپریشن جاری ہے۔
انہوں نے کہا کہ بہادر فوجی جوانوں کی قربانیاں دہشت گردی کے خلاف جنگ میں ہمارے عزم کو مضبوط کرتی ہیں ۔
