امریکی حکومت کی جانب سے سندھ کے محکمہ صحت کو تپ دق (ٹی بی) کی تشخیص وعلاج کی سہولیات کو بہتر بنانے کے لیے 5 موبائل وینز اور 3 ڈیجیٹل ایکسرے مشینیں عطیہ کیں گئی ہیں۔
یہ بھی پڑھیں: پاکستان میں ہر سال ڈھائی لاکھ افراد ٹی بی کے باعث جان سے ہاتھ دھوبیٹھتے ہیں
پاکستان میں مقررامریکی سفیرڈونلڈ بلوم نے یہ وینز اور آلات وزیرِ صحت و آبادی سندھ ڈاکٹرعذرا فضل پیچوہو کو پیش کیے جنہوں نے امریکی حکومت کا شکریہ ادا کرتے ہوئے کہا کہ یہ اقدام پاکستان اور امریکا کے درمیان مضبوط تعلقات کا عکاس ہے اور سندھ میں صحت کے نظام کو بہتر بنانے میں مددگار ثابت ہوگا۔
ڈونلڈ بلوم نے سندھ کے محکمہ صحت کی جانب سے ٹی بی کے خاتمے کے عزم کو سراہا اوران موبائل یونٹس کی اہمیت پر زور دیا۔ انہوں نے کہا کہ یہ وینز سندھ کے کمزور طبقات تک زندگی بچانے والی خدمات پہنچانے میں مددگار ہوں گی۔
مزید پڑھیے: تپ دق کا عالمی دن: تپ دق کے شکار ممالک میں پاکستان کا پانچواں نمبر
واضح رہے کہ سنہ 2022 کے سیلاب کے بعد امریکی حکومت نے صحت کے شعبے میں 74 ملین ڈالر سے زیادہ کی امداد فراہم کی ہے جس میں ٹی بی کی تشخیص کے لیے وینزاورموبائل ایکسرے یونٹس بھی شامل ہیں۔ امداد کا مقصد سندھ کے پسماندہ علاقوں میں صحت کی سہولیات کو بہتر بنانے کے لیے معاونت فراہم کرنا ہے۔
یہ سرمایہ کاری سندھ کے مختلف اضلاع میں سنہ 2030 تک ٹی بی کا خاتمہ ممکن بنانے میں معاون ثابت ہوگی اور اس سے مرض کی تشخیص کی سہولیات کی بہتری، عوامی شمولیت کو فروغ دینے اور صحت کی خدمات کی فراہمی کو مزید مؤثر بنانے میں مدد ملے گی۔
